რატომ არის მნიშვნელოვანი: აქონდროპლაზიის დიაგნოზის მქონე ბავშვების მშობლები მთავრობის ადმინისტრაციასთან ისევ უშედეგოდ ითხოვენ მათი შვილებისთვის სასიცოცხლოდ მნიშვნელოვან მედიკამენტს.

  • ამ დიაგნოზის მქონე ბავშვებისთვის განკუთვნილი ერთადერთი სამკურნალო პრეპარატი საქართველოში არ შემოდის, მისი წლიური დოზა კი წელიწადში, დაახლოებით, 200 000 დოლარი ჯდება.
  • საუბარია 16-მდე ბავშვზე, რომლებმაც წამალი მანამდე უნდა მიიღონ, სანამ მათი ზრდის ზონები დაიხურება.
  • ვოსორიტიდს აშშ-ის წამლისა და საკვების ადმინისტრაციისა (FDA) და ევროპის წამლის სააგენტოს (EMA) ავტორიზაცია 2021 წელს მიენიჭა — ის აქონდროპლაზიის სამკურნალო პირველი პრეპარატია.
  • დღეს ჯანდაცვის მინისტრის მოადგილე აცხადებს, რომ მედიკამენტის შემოსატანად "მეტი დროა საჭირო".

დეტალები: ჯანდაცვის მინისტრის მოადგილე ამტკიცებს, რომ საშულოვადიან და გრძელვადიან პერსპექტივებში არ არის ცნობილი ამ პრეპარატის ზეგავლენა თირკმელზე, ღვიძლზე და სხვა ორგანოებზე.

  • მისი თქმით, მედიკამენტზე მწირი მონაცემები არსებობს, მსოფლიოს განვითარებული ქვეყნები კი "ფრთხილად ეკიდებიან ამ საკითხს".
  • როგორც ის ამბობს, თუ სექტემბრის ბოლომდე ევროკავშირის თუნდაც რამდენიმე ქვეყანაში დადასტურდება, რომ სახელმწიფო პაციენტისთვის ამ მედიკამენტს უზრუნველყოფს, მზად არიან, დაიწყონ მისი აქ შემოტანის პროცედურებიც.
  • "გვქონდა კონსულტაცია ჯანმრთელობის მსოფლიო ორგანიზაციასთან, რომელიც ამბობს, რომ ჯერჯერობით არ აქვს ეს მედიკამენტი აღიარებული, რადგან ძალიან ცოტა დრო გავიდა და მონაცემები მწირია".