რატომ არის მნიშვნელოვანი: პუბლიკას დირექტორი, ზურა ვარდიაშვილი და ტაბულას ჟურნალისტი ბექა ჯიქურაშვილი 2 მარტს რუსული კანონის საწინააღმდეგო აქციაზე დააკავეს.

  • თბილისის საქალაქო სასამართლომ ჯიქურაშვილი და ვარდიაშვილი 2200-2200 ლარით დააჯარიმა.
  • როგორც პუბლიკა წერს, მის მიმართ შედგენილ სამართალდარღვევის ოქმში წერია, თითქოს "ვარდიაშვილი იგინებოდა ხმამაღლა, იყენებდა უწმაწურ სიტყვებს, არ ემორჩილებოდა პოლიციის არაერთგზის კანონიერ მოთხოვნას, რომ გაეთავისუფლებინა გზა".
  • ტაბულას ცნობით, ჯიქურიშვილის სამართალდარღვევის ოქმში წერია, რომ ის "იგინებოდა და ილანძღებოდა უმისამართოდ", აქციის სხვა მონაწილეებთან ერთად კეტავდა გზას, არ ემორჩილებოდა პოლიციას და ხელს უშლიდა სხვა პირების დაკავებაში.

მედიის ადვოკატირების კოალიციის შეფასებით, სასამართლოს გადაწყვეტილებები ჟურნალისტების, მათი საქმიანობის და დემოკრატიული პროცესების წინააღმდეგ გადადგმულ მორიგი ნაბიჯია.

  • ორგანიზაცია ხაზს უსვამს, რომ, ძირითად მტკიცებულებად შინაგან საქმეთა სამინისტროს დაკავების ოქმი და საპატრულო პოლიციის წარმომადგენლის ჩვენება ჰქონდათ წარმოდგენილი.
  • "ზურა ვარდიაშვილის შემთხვევაში კი დაკავების ბრძანების გამცემი, ვაჟა სირაძე მოწმის სახით არ დაკითხული, ვინაიდან სასამართლომ არ დააკმაყოფილა შუამდგომლობა";
  • "არც ერთ შემთხვევაში არ ყოფილა წარმოდგენილი სამხრე კამერის ჩანაწერები. შესაბამისად, დასაბუთებული გადაწყვეტილების გარეშეც ცხადია, რომ მოსამართლე დაეყრდნო მხოლოდ საპატრულო პოლიციისა და შინაგან საქმეთა სამინისტროს წარმომადგენლების მიერ გაკეთებულ ახსნა-განმარტებებს".
  • "თბილისის საქალაქო სასამართლოს მიერ რუსული კანონის წინააღმდეგ გამართულ აქციაზე დაკავებული ჟურნალისტების დაჯარიმება სახიფათო პრეცედენტს ქმნის და მედიაგარემოსთვის დამაზიანებელია";
  • "ცალსახაა, რომ აღნიშნული გადაწყვეტილება პროფესიული საქმიანობის ხელშეშლასა და შეზღუდვას ისახავს მიზნად".