BBC Eye-მ დღეს მასშტაბური ჟურნალისტური გამოძიება გამოაქვეყნა, სადაც დავით კეზერაშვილს, თავდაცვის ყოფილ მინისტრს ქოლ-ცენტრების თაღლითურ სქემებთან კავშირში ამხელს.

რატომ არის მნიშვნელოვანი: აშშ-ს მიერ ქართველი მოსამართლეების სანქცირების ფონზე, ელჩმა კელი დეგნანმა კეზერაშვილის შესაძლო სანქცირებაზე დასმულ კითხვას უპასუხა.

  • დიპლომატის განცხადებით, აშშ სანქციებს წინასწარ არ აცხადებს, თუმცა BBC-ის გამოძიება ძალიან კარგი მაგალითი იმისა, თუ რამდენად მნიშვნელოვანია საგამოძიებო ჟურნალისტიკა და სამართალდამცავი ორგანოების მხრიდან გამოძიების წარმოება.
  • მისი შეფასებით, საზოგადოებას ღია და დახურული წყაროებიდან მოპოვებული ინფორმაცია უნდა მიეწოდოს და ეს გახდეს გადაწყვეტილებების მიღების საფუძველი.

დეტალები: ელჩის თქმით, BBC-ის გამოძიება აშშ-თვის გადაწყვეტილების მისაღებად მნიშვნელოვანი კომპონენტია.

  • "ცხადია, ჩვენ სანამ ასეთ ნაბიჯს გადავდგამთ, საგულდაგულოდ ვსწავლობთ და განვიხილავთ, როცა გვაქვს კონკრეტული ინფორმაცია და რა თქმა უნდა, BBC-ის მსგავსი გამოძიება არის მნიშვნელოვანი კომპონენტი ამისა".
  • "ვიმედოვნებ, რომ საქართველოს ხელისუფლებას ექნება შესაძლებლობა, თავად გამოიძიოს ბრალდებები და ქვეყნის საგამოძიებო სტრუქტურებს შეუძლიათ ამის გამოძიება", — დასძინა მან.

კონტექსტი: BBC-ის ინფორმაციით, თაღლითობის გლობალურმა ქსელმა მილიარდ დოლარზე მეტი მიითვისა. გამოცემამ გამოავლინა ბიზნესმენების ქსელი, რომლებიც ამ თაღლითურ ქსელს მართავს.

  • მათი მტკიცებით, საქმეში ფიგურირებს საქართველოს ყოფილი თავდაცვის მინისტრი, დავით კეზერაშვილი.
  • გამოძიებისას გამოააშკარავეს 152 ბრენდი, მათ შორის Milton Group, რომლებიც, როგორც ჩანს, თაღლითური ქსელის ნაწილია. BBC Eye-მ დაიწყო მილტონის ჯგუფის კორპორატიული დოკუმენტების შესწავლა და ჯგუფის კომპანიებს შორის გარკვეული კავშირები გამოავლინა.
  • BBC-ის ვარაუდით, ამ კომპანიების უკან დგას დავით კეზერაშვილიც, მაგრამ არ არსებობს საჯაროდ ხელმისაწვდომი დოკუმენტები, რომლებიც კეზერაშვილს ქსელთან დააკავშირებს — თუმცა, მისი სახელი ფიგურირებს პანამას დოკუმენტებში, როგორც თაღლითურ ქსელთან დაკავშირებული კომპანიის ერთ-ერთი დამაარსებლის ან მეწილის.