შესაბამისი დასკვნა სახალხო დამცველის აპარატმა გაავრცელა.

რატომ არის მნიშვნელოვანი: მიხეილ სააკაშვილის ოჯახის წევრები, ექიმები და ადვოკატები ექსპრეზიდენტის ჯანმრთელობის მკვეთრ გაუარესებაზე საუბრობენ და საზღვარგარეთ მის სამკურნალოდ გადაყვანას ითხოვენ.

  • სააკაშვილის ჯანმრთელობის მდგომარეობაზე ცენტრ ემპათიის დასკვნაში ნათქვამია, რომ "მოსალოდნელია კომა და სიკვდილი".
  • 28 მარტს სააკაშვილი სოციალურ ქსელში წერდა, რომ მისი ჯანმრთელობის მდგომარეობა ისევ გაუარესდა და მოითხოვდა, კონსილიუმი მასთან მისულიყო და მოენახულებინა.
  • ამისთვის მან სახალხო დამცველს, ლევან იოსელიანს მიმართა, ხელი შეეწყო ამ პროცესისთვის.

დეტალები: ომბუდსმენის მიერ მოწვეული ექსპერტ-სპეციალისტების განცხადებით, 19 აპრილის შემდეგ ყოფილი პრეზიდენტის ჯანმრთელობის მდგომარეობა გაუარესებულია.

  • "ობიექტური გამოკვლევით გამოხატულია მძიმე სარკოპენია. პაციენტმა დაიკლო კიდევ 4 კილოგრამი კუნთების მნიშვნელოვანი განლევის ხარჯზე. გადაადგილება მნიშვნელოვნად შეზღუდულია სისუსტის გამო. წამოდგომისას აღინიშნება წნევის ძლიერი ვარდნა 120/90-იდან 78/40-მდე, რასაც თან ერთვის წონასწორობის კარგვა და კოორდინაციის საგრძნობი მოშლა", — ვკითხულობთ დასკვნაში.
  • კონსილიუმის თქმით, პაციენტს მნიშვნელოვნად აქვს დაქვეითებული გონებრივი ფუნქციები და გამოხატულია დეპრესია.
  • "შთაბეჭდილება: 1. სარკოპენია, კუნთების განლევა, კახექსიის მძიმე 4 სტადია. 2. ორთოსტატიული წნევის კრიტიკული ვარდნა კოორდინაციის მოშლით. პროგნოზი და რისკები: 1. პაციენტი შესულია აქტიური კატაბოლიზმის ფაზაში".

ექიმთა ჯგუფის შეფასებით, წონის კიდევ უფრო დაკლების შემთხვევაში სააკაშვილი საწოლზე მიჯაჭვული გახდება, რადგან მთლიანად განლეული ექნება ქვედა კიდურების კუნთები და სისუსტის გამო ვერ შეძლებს მოძრაობას.

  • "მისთვის კრიტიკულ წონას წარმოადგენს 52-53 კილოგრამი, რის შემდეგადაც დაიწყება ორგანიზმის შეუქცევადი ცვლილებები.
  • ამჟამად ზედამხედველობის გარეშე პაციენტის მოძრაობა სახიფათოა, რადგანაც ძალიან მაღალია დავარდნის, სხეულის დაზიანების/მოტეხილობების რისკი. კახექსიური სხეულის რესურსი იმისათვის, რომ ჭრილობა ან მოტეხილობა შეხორცდეს არის ძალიან დაბალი, რაც გამოიწვევს სხვა კრიტიკული გართულებების (სისხლჩაქცევა, ინფექცია, ღრმა ვენების თრომბოზი და ა.შ ) კასკადურ განვითარებას ლეტალური გამოსავლის მაღალი ალბათობით".