დეპუტატი კახა ოქრიაშვილი პრემიერმინისტრ ირაკლი ღარიბაშვილს ღია წერილით პასუხობს.

რატომ არის მნიშვნელოვანი: ირაკლი ღარიბაშვილმა 24 მარტს პარლამენტში თქვა, კომპანია PSP-მ ონკოლოგიურ მედიკამენტებზე ორას-სამას პროცენტიანი ფასნამატები გააკეთა.

• რაც ღარიბაშვილის განცხადებით, "რეაგირების გარეშე არ დარჩება".
• ოქრიაშვილი ბრალდებებს უარყოფს და პრემიერმინისტრს მისთვის და თითოეული თანამშრომლისთვის ბოდიშის მოხდას მოითხოვ.
• "წინა პერიოდში, ეს ონკოლოგიური პროდუქტი PSP-ს ქსელში იყიდებოდა სპეციალურ ფასად, თვითღირებულებაზე 3-ჯერ უფრო იაფად, რადგან ჰქონდა მოკლე ვადა. მიღებული პრაქტიკაა, რომ მოკლევადიანი მედიკამენტი რამდენჯერმე უფრო იაფად იყიდება, ვიდრე მისი შესასყიდი ფასია, რათა ვადა არ გაუვიდეს".

დეტალები: დეპუტატის განცხადებით, ჯანდაცვის სამინისტრომ პრემიერს არასწორი ინფორმაცია მიაწოდა.

• "პრემიერმა კი, უკვე მერამდენედ, გააჟღერა გადაუმოწმებელი ფაქტები და პარლამენტის ტრიბუნიდან დასდო ბრალი საქართველოს ეკონომიკის ერთ-ერთ ბურჯს, ჩემს მიერ აშენებულ PSP-ს, რომელიც ჩვენი ქვეყნის უმსხვილესი კომპანიების ხუთეულში შედის, რომელმაც 8 000 -ზე მეტი სამუშაო ადგილი შექმნა, რაც საქართველოს დასაქმებული მოსახლეობის თითქმის 1%-ია და რომელიც ყოველწლიურად, უკვე ათწლეულებია, 50 მილიონ ლარამდე გადასახადს იხდის საქართველოს ბიუჯეტში";
• "რაც შეეხება მედიკამენტებს, მათ შორის, თურქულს, კომპანიის წლიური მოგება არ აღემატება კომპანიის ბრუნვის";
• "5-6%-ს და ეს მოგება 10%-იც რომ იყოს, აბსოლუტურად სამართლიანია. აქვე, შევეხები თურქეთის ბაზრის გახსნის თემას";
• "პრემიერი თავს იწონებს, რომ თურქეთის ბაზარი გახსნა და თურქეთიდან შემოსული მედიკამენტების ფასი შეამცირა. დიახ, ასეა, მაგრამ ამას ვითხოვდით ჩვენ, ფარმაცევტული კომპანიები, ჯერ კიდევ 2010 წლიდან", — ვკითხულობთ წერილში.

გარდა ამისა, კახა ოქრიაშვილი აცხადებს, რომ ქართული ოცნების ყველა ჯანდაცვის მინისტრისთვის აქვს ნათქვამი, გაეხსნათ თურქული ბაზარი.

• "სად იყავით 10 წელი?! რატომ მოანდომეთ ამდენი დრო ერთი ფურცლის დაწერას? თურქული ბაზარი თქვენ კი არ გახსენით, ჩვენ, ფარმაცევტულმა კომპანიებმა და პირადად მე გაგახსნევინეთ!"
• აღნიშნავს იმასაც, რომ ამ პირობებში არ არის გასაკვირი, რომ საქართველოს არ აქვს პროგრესი — "ასე ეპყრობა ხელისუფლება ყველა ბიზნესს, თუ ეს ბიზნესი არ არის დაკავშირებული ბატონ ივანიშვილთან, ან ქართული ოცნების წევრებთან".

აქამდე ჯანდაცვის სამინისტრომ განაცხადა, რომ მედიკამენტებზე რეფერენტული ფასების ამოქმედების შემდეგ, ცალკეული ფარმაცევტული კომპანიების მხრიდან ადგილი აქვს მორიგ არაკეთილსინდისიერ ქმედებებს.

• უწყება ირწმუნება, რომ საქმე ონკოლოგიური დანიშნულების ძვირადღირებულ მედიკამენტებს ეხება, რომლებზეც რეფერენტული ფასი არ არის დაწესებული და რომლებიც სახელმწიფოს მიერ საყოველთაო ჯანდაცვის პროგრამის ფარგლებში ფინანსდება.
• PSP აცხადებს, რომ ონკოლოგიურ მედიკამენტებზე საოპერაციო ხარჯებისთვის განსაზღვრული პოლიტიკით მინიმალური დარიცხვები ორიდან 25 პროცენტამდე არის განსაზღვრული და ჯანდაცვის სამინისტროსთვის ცნობილია მედიკამენტების თვითღირებულება.
• მათი განმარტებით, კომპანიაში არსებული ხარისხის სისტემის მიხედვით, ხდება იმ პროდუქციის რეალიზაციიდან ამოღება, რომელთა მოქმედების ვადაც ერთ თვეზე ნაკლებია.
• 2023 წლის მარტიდან აღნიშნულ პოზიციაზე ონკოლოგიური მედიკამენტები საწყის ფასებს უბრუნდება.
• კომპანიის მტკიცებით, 40-ზე მეტ, მათ შორის თურქეთიდან იმპორტირებულ მედიკამენტზე მოხდა ფასების შემცირება, ხოლო შვიდ მედიკამენტზე მოხდა 2022 წლის ბოლო კვარტლის ღირებულებაზე დაბრუნება.