ამის შესახებ ორგანიზაცია განცხადებას ავრცელებს.

რატომ არის მნიშვნელოვანი: რუსული კანონის წინააღმდეგ პროტესტის დაწყების დღიდან მედიის წარმომადგენლებს პროფესიული მოვალეობის შესრულებასა და გამოხატვის თავისუფლებით სარგებლობაში მიზანმიმართულად ეშლებოდათ ხელი.

  • 2 მარტს, პარლამენტის ეზოდან ფიზიკური ძალის გამოყენებით გამოაგდეს On.ge-ის რედაქტორი, თამუნა გეგიძე, ფორმულას ფოტოგრაფი, ვახო ქარელი და ნეტგაზეთის ჟურნალისტი, მიხეილ გვაძაბია;
  • ამავე დღეს დააკავეს პუბლიკას დირექტორი, ზურაბ ვარდიაშვილი და ტაბულას ჟურნალისტი, ბექა ჯიქურაშვილი.

  • 7-8 მარტის აქციებზე სამართალდამცველებმა იძალადეს მედიის წარმომადგენლებზე და ხელი შეუშალეს ჟურნალისტურ საქმიანობაში, მიუხედავად იმისა, რომ იცოდნენ, ისინი ასრულებდნენ პროფესიულ მოვალეობას.

დეტალები: მედიის ადვოკატირების კოალიცია მიიჩნევს, რომ ჟურნალისტების მიმართ გამოვლენილი დანაშაულების გამოძიება და დამნაშავეების სათანადოდ დასჯა მნიშვნელოვანია, რათა ჟურნალისტების უფლებების დარღვევის გახშირებული შემთხვევები შემცირდეს.

  • "კოალიცია მოუწოდებს სპეციალურ საგამოძიებო სამსახურს, უზრუნველყოს მედიის წარმომადგენელთა მიმართ სამართალდამცავების მხრიდან არაპროპორციული ძალის გამოყენების, საქმიანობაში ხელის შლების, ჟურნალისტთა მიმართ ჩადენილი ძალადობისა და სხვა შემთხვევების სწრაფი, სრულყოფილი და ობიექტური გამოძიება; მაღალი საჯარო ინტერესის გათვალისწინებით, გამოძიების მიმდინარეობის და გამოკვეთილი შედეგების შესახებ პერიოდულად მიაწოდოს საზოგადოებას განახლებული მონაცემები", — ნათქვამია მედიის ადვოკატირების განცხადებაში.