სახელმწიფო უსაფრთხოების სამსახური აფგან მუხტარლის საქმესთან დაკავშირებით აზერბაიჯანელი დეპუტატის ინტერვიუს პასუხობს. განცხადებას უცვლელად გთავაზობთ:

"აზერბაიჯანელი დეპუტატის ელმან ნასიროვის განცხადება იმის თაობაზე, რომ ჟურნალისტ აფგან მუხთარლის დაკავება იყო აზერბაიჯანისა და საქართველოს სპეცსამსახურების ერთობლივი მუშაობის შედეგი, სიმართლეს არ შეესაბამება. სახელმწიფო უსაფრთხოების სამსახური დეპუტატის მიერ გავრცელებულ ინფორმაციას და რაიმე კავშირს აფგან მუხთარლის საქმესთან კატეგორიულად უარყოფს.

აზერბაიჯანელი ჟურნალისტის, აფგან მუხთარლის საქმესთან დაკავშირებით, საქართველოს შინაგან საქმეთა სამინისტრო გამოძიებას აწარმოებს საქართველოს სსკ-ს 143-ე მუხლით, რაც თავისუფლების უკანონო აღკვეთას გულისხმობს".

აზერბაიჯანის პარლამენტის ადამიანის უფლებათა კომიტეტის წევრი, სახელისუფლებო პარტიის წარმომადგენელი, პარლამენტარი ელმან ნასიროვი რადიო თავისუფლების აზერბაიჯანულ სამსახურთან ინტერვიუში აცხადებს, რომ ჟურნალისტ აფგან მუხტარლის დაკავება ქართულ-აზერბაიჯანული სპეცსამსახურების ერთობლივი, წარმატებული ოპერაცია იყო. ელმან ნასიროვი ამბობს, რომ მუხტარლის დააკავეს, რადგან ის იყო თბილისში, აზერბაიჯანის ხელისუფლების წინააღმდეგ ჩამოყალიბებული ქსელის ერთ-ერთი ყველაზე აქტიური წევრი და ქვეყნის მოღალატე.

თბილისიდან 29 მაისს გაუჩინარებული ჟურნალისტი, აფგან მუხტარლი, რომელიც მეორე დღეს ბაქოს ციხეში აღმოჩნდა, ამბობს, რომ ის საქართველოს დედაქალაქიდან სწორედ კრიმინალური პოლიციის ფორმიანმა პირებმა გაიტაცეს, რასაც საქართველოს ხელისუფლება უარყოფს. შსს ამ ეტაპზე მხოლოდ აზერბაიჯანელი კოლეგების მიერ მიწოდებულ ინფორმაციას აჟღერებს. აზერბაიჯანის ხელისუფლების ინფორმაციით, მუხტარლი საზღვრის უკანონო კვეთის გამო დააკავეს და მას უკვე შეეფარდა სამთვიანი წინასწარი პატიმრობა