აზერბაიჯანის პარლამენტის ადამიანის უფლებათა კომიტეტის წევრი, სახელისუფლებო პარტიის წარმომადგენელი, პარლამენტარი ელმან ნასიროვი რადიო თავისუფლების აზერბაიჯანულ სამსახურთან ინტერვიუში აცხადებს, რომ ჟურნალისტ აფგან მუხტარლის დაკავება ქართულ-აზერბაიჯანული სპეცსამსახურების წარმატებული ოპერაცია იყო. ელმან ნასიროვი ამბობს, რომ მუხტარლის დააკავეს, რადგან ის იყო თბილისში, აზერბაიჯანის ხელისუფლების წინააღმდეგ ჩამოყალიბებული ქსელის ერთ-ერთი ყველაზე აქტიური წევრი და ქვეყნის მოღალატე.

"ინციდენტის ანალიზი აჩვენებს, რომ აფგან მუხტარლი მხოლოდ დიდი ქსელის ერთი წევრია. დიდმა პოლიტიკურმა ძალებმა აფგან მუხტარლის მსგავსი პირები შემოიკრიბეს საქართველოში. მხოლოდ აფგანი რომ ყოფილიყო პრობლემა, რა თქმა უნდა, მისი დაპატიმრების საჭიროება არ იქნებოდა. ის პოლიტიკური ქსელი საქართველოში, რომლის ნაწილიც მუხტარლია, ახორციელებს მავნებლურ ქმედებებს აზერბაიჯანში და ბუნებრივია, ისინი შეეწინააღმდეგებოდნენ მის დაპატიმრებას აზერბაიჯანში და დაიცავდნენ მას. ამ თვალსაზრისით, ეს ერთობლივი ნაბიჯი აზერბაიჯანსა და საქართველოს შორის იყო სპეცსამსახურების მუშაობის შედეგი.

აზერბაიჯანულმა სპეცსამსახურებმა იმუშავეს პროფესიონალურად და შეძლეს მუხტარლის აზერბაიჯანში ჩამოყვანა რაიმე პრობლემისა და დაპირისპირების გარეშე. მათ კრიმინალი ჩამოიყვანეს აზერბაიჯანში, რაც აზერბაიჯანის სპეცსამსახურების ერთ-ერთი ყველაზე წარმატებული ოპერაციაა".

ჟურნალისტმა დეპუტატს ასევე ჰკითხა, მას სწორად მიაჩნდა თუ არა ადამიანის გატაცება თავზე შავი ტომრით და მისი ამ ფორმით ჩაყვანა აზერბაიჯანში.

ელმან ნასიროვმა თქვა, რომ ეს არის "ტექნიკური საკითხი" და მთავარია, რომ ოპერაცია იყო წარმატებული.

თბილისიდან 29 მაისს გაუჩინარებული ჟურნალისტი, აფგან მუხტარლი, რომელიც მეორე დღეს ბაქოს ციხეში აღმოჩნდა, ამბობს, რომ ის საქართველოს დედაქალაქიდან სწორედ კრიმინალური პოლიციის ფორმიანმა პირებმა გაიტაცეს, რასაც საქართველოს ხელისუფლება უარყოფს. შსს ამ ეტაპზე მხოლოდ აზერბაიჯანელი კოლეგების მიერ მიწოდებულ ინფორმაციას აჟღერებს. აზერბაიჯანის ხელისუფლების ინფორმაციით, მუხტარლი საზღვრის უკანონო კვეთის გამო დააკავეს და მას უკვე შეეფარდა სამთვიანი წინასწარი პატიმრობა.

განახლება: საქართველოს უსაფრთხოების სამსახურმა განცხადება გაავრცელა, რომლის მიხედვითაც უარყოფს რაიმე სახის მონაწილეობას აფგან მუხტარლის დაკავების საქმეში.