ინფორმაციას საქართველოს საგარეო საქმეთა სამინისტრო ავრცელებს.

რატომ არის მნიშვნელოვანი: თურქეთში მიწისძვრა 6 თებერვალს, გვიან ღამით, ადგილობრივი დროით დილის 4 საათზე, ნურდაგიდან 23 კილომეტრში 7,8 მაგნიტუდის სიმძლავრის მიწისძვრა მოხდა.

  • გამთენიისას მომხდარ მიწისძვრას 40-ზე მეტი ბიძგი მოჰყვა, რომელთაგან ყველაზე ძლიერი 6,6 მაგნიტუდის იყო.
  • შუადღის შემდეგ კი, ეპიცენტრში კიდევ ერთი — 7,6 მაგნიტუდის მიწისძვრა დაფიქსირდა.
  • სამძებრო-სამაშველო სამუშაოები ამ დრომდე გრძელდება, რის გამოც, სავარაუდოდ, დაღუპულთა და დაშავებულთა რაოდენობის ზრდაა მოსალოდნელი.

დეტალები: საგარეოს განცხადებით, სტიქიის ზონაში მყოფი საქართველოს მოქალაქეების ადგილსამყოფელის, მათი მდგომარეობისა და საჭიროებების დადგენის მიზნით, დიპლომატიური წარმომადგენლობა მუდმივ კავშირზეა თურქეთის რესპუბლიკის საგანგებო სიტუაციების ცენტრთან.

  • "აღსანიშნავია, რომ სტიქიის ზონაში, საავტომობილო გზებისა და აეროპორტების დაზიანების გამო, შეფერხებულია გადაადგილება. აკრძალულია ავტოტრანსპორტის მოძრაობა";
  • "გარდა ამისა, ვითარებას ართულებს რთული მეტეოროლოგიური პირობები და განმეორებითი ბიძგები";
  • "შესაბამისად, მდგომარეობა სწრაფად იცვლება. იცვლება დაზარალებულთა და გარდაცვლილთა რიცხვიც", — ვკითხულობთ განცხადებაში.

გარდა ამისა, უწყებაში აღნიშნავენ, რომ საელჩოს მიმართა ასზე მეტმა საქართველოს მოქალაქემ.

  • საგარეოს განმარტებით, განსაკუთრებით რთული იყო 20-მდე მოქალაქის შემთხვევა — "აქედან, 14 მოქალაქის ადგილსამყოფელი, ამ ეტაპზე, დადგენილია. შედგა მათთან კომუნიკაცია. მათ სიცოცხლეს საფრთხე არ ემუქრება, ხოლო 6 მოქალაქის ადგილსამყოფელის დადგენაზე მუშაობა ამ დრომდე გრძელდება".
  • "ამ ეტაპზე დასტურდება საქართველოს ორი მოქალაქის გარდაცვალება. საქართველოს საელჩო აქტიურად მუშაობს სტიქიის ზონაში მყოფი მოქალაქეების დასახმარებლად".