ზორან მილანოვიჩის განცხადებით, ყირიმი აღარასდროს დაბრუნდება უკრაინის შემადგენლობაში.

რატომ არის მნიშვნელოვანი: ყირიმი უკრაინის ნახევარკუნძულია, რომელიც 2014 წლიდან რუსეთის მიერაა ანექსირებული.

  • ვოლოდიმირ ზელენსკიმ პირობა დადო, რომ ყირიმზე მმართველობას აღადგენს.
  • მსოფლიო ქვეყნების უმრავლესობა არ აღიარებს რუსეთის მიერ ჩატარებული რეფერენდუმის შედეგებს, რომლის მიხედვითაც ყირიმელებს რუსეთის შემადგენლობაში ყოფნა სურთ.
  • ხორვატია შენგენის ზონის უახლესი წევრი სახელმწიფოა, რომლის პრეზიდენტის ანტი-დასავლურმა განცხადებებმა და უკრაინისთვის სამხედრო დახმარებაზე უარის თქმამ ქვეყნის შიგნით, პრემიერ-მინისტრ ანდრეი პლენკოვიჩთან განხეთქილება გამოიწვია.
  • ევროპაში მილანოვიჩი უნგრეთის პრემიერ მინისტრის, ვიქტორ ორბანისა და ბოსნიელი სერბების სეპარატისტული ლიდერის, მილორად დოდიკის თანამოაზრედ მიიჩნევა.

დეტალები: მილანოვიჩმა ასევე ისაუბრა ზაგრების მიერ კიევისთვის სამხედრო დახმარების გაწევის დაუშვებლობაზე.

  • მისი მტკიცებით, არ სურს ხორვატიამ გამოიაროს ის, რაც უკრაინაში 11-თვიან ომს მოჰყვა.
  • დეკემბერში ხორვატმა კანონმდებლებმა უარყვეს წინადადება, რომლის მიხედვითაც ქვეყანა უნდა შეერთებოდა ევროკავშირის მისიას უკრაინელი სამხედროების მხარდასაჭერად.
  • ხორვატიის პრეზიდენტის შეფასებით, დასავლეთის უკრაინისადმი სამხედრო დახმარება მხოლოდ რუსეთის ჩინეთთან დაახლოებას ემსახურება.

უკრაინის საგარეო საქმეთა სამინისტრო მიუღებლად მიიჩნევს ყირიმის თაობაზე ხორვატიის პრეზიდენტის განცხადებას.

  • "ღირს დაფიქრება, შეიძლებოდა თუ არა ზორან მილანოვი ასეთი რიტორიკით თავისი ქვეყნის პრეზიდენტი გამხდარიყო 1990-იან წლებში, როცა ხორვატია დამოუკიდებლობისთვის იბრძოდა? დათანხმდებოდნენ თუ არა მისი ამომრჩევლები ქვეყნის ნაწილის ოკუპაციაზე თვალის დახუჭვას?", — განაცხადა უკრაინის საგარეო საქმეთა სამინისტროს სპიკერმა.
  • "სანაცვლოდ, ჩვენ დიდად ვაფასებთ და მადლობას ვუხდით ხორვატიის მთავრობას და ხალხს უკრაინელების ურყევი მხარდაჭერისთვის რუსული აგრესიის წინააღმდეგ ბრძოლაში", — დასძინა მან.