ამის შესახებ ინფორმაციას პროკურატურა ავრცელებს.

რატომ არის მნიშვნელოვანი: 20 წლის ფეხბურთელი, ვახტანგ ჩარკვიანი 2021 წლის სექტემბერში, რესპუბლიკურ საავადმყოფოში გარდაიცვალა. ოჯახი მიიჩნევს, რომ ის კორონავირუსზე არასათანადო მკურნალობას ემსხვერპლა.

  • სამართალდამცავი უწყების ცნობით, პაციენტის სამედიცინო ისტორიის დახურვის შემდეგ აღმოჩნდა, რომ დანიშნულების ფურცლები შესაბამისი მორიგე ექთნების მიერ ხელმოწერილი არ იყო და დოკუმენტზე, მათ ნაცვლად, ხელი უფროსმა ექთანმა მოაწერა.
  • პროკურატურის განცხადებით, ბრალდებულმა დოკუმენტში შეიტანა არასწორი ინფორმაცია, თითქოს პაციენტისთვის ჩატარებული სამედიცინო მანიპულაციები მის მიერ იყო შესრულებული.
  • მათივე ინფორმაციით, რეალურად, ბრალდებულს აღნიშნული სამედიცინო მანიპულაციები არ ჩაუტარებია და არც მათ ჩატარებაში მიუღია მონაწილეობა.

დეტალები: ცენტრალური საუნივერსიტეტო კლინიკის უფროს ექთანს ბრალდება ყალბი ოფიციალური დოკუმენტის დამზადებისა და გამოყენების ფაქტზე წარედგინა.

  • პროკურატურის განცხადებით, სისხლის სამართლის საქმეზე გამოძიება გრძელდება და დანიშნულია შესაბამისი ექსპერტიზები პაციენტის გარდაცვალების უშუალო მიზეზის დასადგენად.