განახლება: თავდაპირველად სათაურში მითითებული იყო, რომ გრინსერვისმა ტენდერი მოიგო, მაგრამ ოფიციალურად ხელშეკრულება ჯერ ატვირთული არ არის. მერიაში და კომპანიაში განმარტავენ, რომ ტენდერი ჯერ შერჩევა-შეფასების ეტაპზეა. On.ge ბოდიშს უხდის მკითხველს არაზუსტი ინფორმაციის გავრცელებისთვის.

ინფორმაცია გრინსერვისის მონაწილეობის შესახებ სახელმწიფო შესყიდვების ვებგვერდზე გამოქვეყნდა და On.ge-ის თბილისის მერიამ დაუდასტურა.

რატომ არის მნიშვნელოვანი: 2022 წლის 12 ოქტომბერს თბილისის მერიამ ვაკის პარკის შადრევანი საზეიმოდ გახსნა, 13 ოქტომბერს კი შადრევანში ჩასულ ბავშვებს დენმა დაარტყა. 13 წლის მოზარდი გარდაიცვალა, ხოლო 2 ბავშვი დაშავდა.

• პარკის სარეაბილიტაციო სამუშაოებს კომპანია გრინსერვისი+ ასრულებდა, რომლის დამფუძნებლის, ლაშა ფურცხვანიძის წინააღმდეგ, 2013 წელს სამეწარმეო საქმიანობაში უკანონო მონაწილეობის და უკანონო შემოსავლის ლეგალიზაციის საქმეზე გამოძიება მიმდინარეობდა.
• შადრევნის ოფიციალურად დოკუმენტაციაში წერია, რომ გრინსერვისი+-მა ჩააბარა, ხოლო მერიის გარემოს დაცვის საქალაქო სამსახურმა მიიღო მშენექსპერტის ინსპექტირების ანგარიშით დადასტურებული შადრევნისა და კასკადის სარეაბილიტაციო სამუშაოები — თუმცა უსაფრთხოების დასკვნა ნახსენები არ არის.
• გამოძიების თანახმად, ლაშა ფურცხვანიძემ შესრულებული სამუშაო შესაბამისი ინსპექტირების ჩატარების გარეშე წარუდგინა მერიის საქალაქო სამსახურს, ხოლო გარემოს დაცვის სამსახურის უფროსის მოადგილემ მიიღო შესაბამისი ინსპექტირების გარეშე.
• საქმეზე ბრალი წაუყენეს 9 პირს, მათ შორის გრინსერვის+-ის დირექტორს, კომპანიის სამუშაოთამწარმოებელს და 1 თანამშრომელს — ყალბი დოკუმენტების დამზადებაზე და გულგრილობაზე, რამაც სიცოცხლის მოსპობა გამოიწვია.
• აღკვეთის ღონისძიების სახით ყველა დაკავებულს პატიმრობა შეეფარდა.

დეტალები: გრინსერვის პლიუსის ახალი ტენდერების ჯამური თანხა 9 995 000 ლარია.

• კომპანიამ თბილისის მუნიციპალიტეტის ტერიტორიაზე არსებული გამწვანებული ტერიტორიების აღდგენა-მოწყობის სამუშაოები უნდა შეასრულოს, რისთვისაც ბიუჯეტიდან 6 850 000 ლარი გამოიყოფა.
• ხოლო მეორე ტენდერით გათვალისწინებული სამუშაოები კეთილმოწყობისა და დაზიანებული ინფრასტრუქტურული ობიექტების აღდგენას გულისხმობს, რომლისთვისაც 3 145 000 ლარი დაიხარჯება.
• კომპანია ორივე ტენდერში ერთადერთი მონაწილეა — ხელშეკრულება ჯერ გაფორმებული არ არის, რადგან შერჩევა-შეფასების ეტაპს გადის.
• თუმცა ატვირთულია დოკუმენტი ინტერესთა კონფლიქტის არარსებობის შესახებ.

თბილისის მერიაში On.ge-ს უთხრეს, რომ მერია არ და ვერ ჩაერევა სატენდერო პროცესში, რადგან ტენდერი ტარდება მხოლოდ და მხოლოდ შესყიდვების კანონის და წესების შესაბამისად, ელექტრონული სისტემის საშუალებით.

• "შესყიდვების მიხედვით, კომპანია გრინსერვისი + არ აქვს შესყიდვებში მონაწილეობის უფლება შეზღუდული, ამდენად თბილისის მერია უფლებაშეზღუდულია, მიანიჭოს პრიორიტეტი ან უარი უთხრას რომელიმე მონაწილე კონპანიას საკუთარი შეხედულებების მიხედვით", — განგვიმარტეს უწყებაში.