ამის შესახებ უწყება განცხადებას ავრცელებს.

რატომ არის მნიშვნელოვანი: 18 მარტს გავრცელდა ინფორმაცია, რომ ახალციხეში ექთანი AstraZeneca-ს ვაქცინის გაკეთების შემდეგ კომაში ჩავარდა. მოგვიანებით გაირკვა, რომ მას, სავარაუდოდ, ანაფილაქსიური რეაქცია ჰქონდა.

  • 27 წლის ქალი პირველ საუნივერსიტეტო კლინიკაში გადაიყვანეს, თუმცა მკურნალობიდან მალევე, გულის გაჩერებით, გარდაიცვალა.

დეტალები: პროკურატურამ ახალციხის კლინიკა იმედის ექიმის მიმართ ბრალდების შესახებ დადგენილება გამოიტანა.

  • უწყების ცნობით, კოვიდ 19-ის ვაქცინაციის შემდეგ პაციენტი ექიმის მეთვალყურეობის ქვეშ 30 წუთის განმავლობაში უნდა ყოფილიყო, რა დროსაც ვალდებული იყო, ვაქცინაციის შემდგომი შესაძლო გართულების შემთხვევაში პაციენტისთვის გადაუდებელი პირველადი სამედიცინო დახმარება გაეწია.
  • "ექიმმა ვაქცინაციიდან დაახლოებით 20 წუთის შემდეგ, მეგი ბაქრაძე დაყოვნების ოთახში ნახა, რა დროსაც მას კისრის და გულმკერდის ზედაპირზე აღენიშნებოდა სიწითლე, რაც ვაქცინაციის შემდგომ გართულებას და ანაფილაქსიად მიჩნეულ მდგომარეობას წარმოადგენდა", — ნათქვამია განცხადებაში.
  • პროკურატურის მტკიცებით, ექიმმა მეგი ბაქრაძე სიცოცხლისთვის საშიშ მდგომარეობაში იხილა და ვალდებული იყო, შესაბამისი მკურნალობა ჩაეტარებინა, თუმცა დახმარება არ გაუწია და კლინიკის ტერიტორია დატოვა.
  • უწყების განმარტებით, დროული დახმარების არ გაწევის გამო, პაციენტის მდგომარეობა დამძიმდა და ვაქცინაციის შემდეგ წარმოქმნილი გართულებების შედეგად, ანაფილაქსიური შოკით გარდაიცვალა.

პროკურატურის თქმით, ექიმის მიმართ გამოტანილია ბრალდების შესახებ დადგენილება, ავადმყოფის განსაცდელში მიტოვების მუხლით, რამაც მისი სიცოცხლის მოსპობა გამოიწვია.

  • მუხლი სასჯელის სახედ და ზომად 3-დან 5 წლამდე თავისუფლების აღკვეთას ითვალისწინებს.
  • უწყებამ ამავე საქმეზე, ცრუ ინფორმაციის მიწოდებისთვის პირადი მოტივით, ბრალდება სამ პირს წარუდგინა და თბილისის საქალაქო სასამართლოში საქმის არსებითი განხილვა მიმდინარეობს.