ამის შესახებ საუბარია საერთაშორისო გამჭვირვალობა — საქართველოს კვლევაში, რომელიც აბასთუმანში კორუფციის რისკებს შეისწავლიდა.

რატომ არის მნიშვნელოვანი: ორგანიზაციის დასკვნით, კურორტი პრიორიტეტულად სახელმწიფოსთვის მას შემდეგ იქცა, რაც ივანიშვილმა თქვა, რომ "აბასთუმანი უნდა გახდეს ერთ-ერთ საუკეთესო ცენტრი მსოფლიოში".

  • გამჭვირვალობის შეფასებით, კვლევამ აბასთუმნის მაგალითზე წარმოაჩინა, როგორ სწრაფად და ყოველგვარი წინააღმდეგობის გარეშე წარმართავს სახელმწიფო მნიშვნელოვან საბიუჯეტო რესურსებს ივანიშვილის ბიზნესპროექტებისთვის გარემოს გასაუმჯობესებლად.
  • კვლევის თანახმად, ბოლო 4 წელიწადში სახელმწიფომ აბასთუმანში 20-ჯერ მეტი მიწა გაყიდა, ვიდრე ქართული ოცნების ხელისუფლებაში მოსვლიდან პირველ 6 წელიწადში.
  • პრივატიზებული ფართობის 91,7% ქართულ ოცნებასთან დაკავშირებულმა სუბიექტებმა იყიდეს, 81,1% კი — პირადად ბიძინა ივანიშვილმა და მასთან დაკავშირებულმა პირებმა.

დეტალები: კვლევაში ნათქვამია, რომ 2018 წლის აგვისტოდან დღემდე 6-მა საჯარო უწყებამ აბასთუმნის განვითარებისთვის დახარჯა 249 920 551 ლარი, თითქმის 14-ჯერ მეტი, ვიდრე 2012-2018 წლებში.

  • "ამ თანხის 93.4% 2018 წლის აგვისტოდან დღემდე დაიხარჯა, ანუ მას შემდეგ, რაც აბასთუმნით ბიძინა ივანიშვილი დაინტერესდა", — ნათქვამია ანგარიშში.

გარდა ამისა, TI-ის კვლევის თანახმად, ბოლო ოთხ წელიწადში აბასთუმანში სახელმწიფო შესყიდვებით გახარჯული თანხის 83,1% — 207 720 451 ლარი, ქართული ოცნების შემომწირველებთან დაკავშირებულმა კომპანიებმა მიიღეს.

  • მათ, სხვადასხვა დროს მმართველ პარტიას 1 276 000 ლარი შესწირეს.
  • ყველაზე მეტი თანხა (150 968 119) 16 შესყიდვით საავტომობილო გზების დეპარტამენტმა გამოყო. ყველაზე ნაკლები კი (126 697) 2 შესყიდვით — კულტურული მემკვიდრეობის დაცვის ეროვნულმა სააგენტომ.