საქართველოს საგარეო საქმეთა მინისტრის მოადგილე, ლაშა დარსალია და საქართველოში ამერიკის შეერთებული შტატების ელჩის მოვალეობის შემსრულებელი, ალან პარსელი ერთმანეთს შეხვდნენ. ამის შესახებ ინფორმაციას საგარეო საქმეთა სამინისტრო ავრცელებს.

მათი ცნობით, 15 იანვარს გამართული შეხვედრისას ამერიკულმა მხარემ მინისტრის მოადგილეს სახდეპის გადაწყვეტილებასთან დაკავშირებით დეტალური ინფორმაცია მიაწოდა, რომელიც კონკრეტული კატეგორიის ვიზების წარმოების დროებით შეჩერების საკითხს ეხება.

საგარეო საქმეთა სამინისტროს ინფორმაციით, ელჩის მოვალეობის შემსრულებელმა განმარტა, რომ მსოფლიოს 75 ქვეყნის, მათ შორის საქართველოს მოქალაქეებისთვის ცვლილებები მხოლოდ საიმიგრაციო ტიპის ვიზებს ეხება.

"აღსანიშნავია, რომ აღნიშნული არ ვრცელდება ვიზებზე, რომლებიც სხვა მიზნებისთვის გაიცემა.

შეხვედრის ფარგლებში ასევე განხილულ იქნა როგორც ორმხრივი და მრავალმხრივი საკითხები, ისე რეგიონში მიმდინარე მოვლენები", — აღნიშნულია ინფორმაციაში.

ცნობისთვის, აშშ-ის სახელმწიფო დეპარტამენტი 75 ქვეყნის მოქალაქეებისთვის, მათ შორის, ქართველებისთვის საემიგრაციო ვიზების დამუშავებას აჩერებს, იმ მიზნით, რომ გაამკაცროს კონტროლი იმ განმცხადებლებზე, რომლებიც შესაძლოა მომავალში "სახელმწიფო ვალდებულებად" (public charge) იქცნენ. ამის შესახებ ინფორმაციას Fox News ავრცელებს.

სახელმწიფო დეპარტამენტის მემორანდუმის მიხედვით, რომელიც პირველად Fox News Digital-მა გაავრცელა, საკონსულოს ოფიცრებს არსებული კანონის საფუძველზე ვიზებზე უარის თქმა ევალებათ, სანამ დეპარტამენტი ხელახლა შეაფასებს სკრინინგის და შემოწმების პროცედურებს.

ვიზების დამუშავების შეჩერება 21 იანვრიდან დაიწყება და განუსაზღვრელი ვადით გაგრძელდება, ვიდრე სახელმწიფო დეპარტამენტი იმიგრაციული პროცესების გადახედვას არ დაასრულებს.