ოცნების პრემიერი, ირაკლი კობახიძე დავოსის ეკონომიკის ფორუმზე წელსაც არ მიიწვიეს. ამის შესახებ bm.ge-ს ოცნების ხელისუფლების მთავრობის ადმინისტრაციაში დაუდასტურეს. ირაკლი კობახიძე დავოსის ეკონომიკურ ფორუმზე არც გასულ წელს იყო მიწვეული.

წლევანდელი, რიგით 56-ე ყოველწლიური ფორუმი 2026 წლის 19-23 იანვარს ჩატარდება და 130-ზე მეტი ქვეყნის 3000-მდე სხვადასხვა სექტორის ლიდერს გააერთიანებს. ღონისძიებაში მონაწილეობას მიიღებს: 400 წამყვანი პოლიტიკური ლიდერი, მათ შორის 65 სახელმწიფოსა და მთავრობის მეთაური და G7-ის 6 ლიდერი, ამას გარდა — მსოფლიოს თითქმის 850 წამყვანი აღმასრულებელი დირექტორი და თავმჯდომარე და თითქმის 100 წამყვან უნიქორნ-სტარტაპ და ტექნოლოგიური პარტნიორი.

დავოსის ეკონომიკური ფორუმის ვებგვერდზე ვკითხულობთ, რომ წლევანდელი ფორუმის თემაა "დიალოგის სულისკვეთება" და ის წარმოადგენს მიუკერძოებელ პლატფორმას ლიდერების დასაკავშირებლად, რათა ისინი გაუმკლავდნენ საერთო გამოწვევებს და ხელი შეუწყონ მომავლის განმსაზღვრელ ინოვაციებს.

"ღრმა გეოპოლიტიკური, ტექნოლოგიური და საზოგადოებრივი ცვლილებებით განსაზღვრულ მომენტში, მსოფლიო ეკონომიკური ფორუმის ყოველწლიური შეხვედრა უზრუნველყოფს მიუკერძოებელ პლატფორმას დიალოგისთვის, თანამშრომლობისა და მოქმედებისთვის.

ხუთ ათწლეულზე მეტი ხნის განმავლობაში, ფორუმი აერთიანებს ბიზნესის, მთავრობის, სამოქალაქო საზოგადოების, საერთაშორისო ორგანიზაციების, აკადემიური წრეების და მომავალი თაობის ლიდერებს, რათა გააცნობიერონ გლობალური გამოწვევები და ერთად წაიყვანონ მსოფლიო წინ.

წლევანდელი პროგრამა ეფუძნება ამ მემკვიდრეობას, რომელიც ჩამოყალიბებულია ფორუმის მიმდინარე მუშაობით, უახლესი გლობალური განვითარებებითა და გარღვევის ინოვაციებით.

პროგრამა შექმნილია იდეების გასაღვივებლად, ურთიერთდაკავშირებული გამოწვევების გრძელვადიანი გადაწყვეტილებების წარმოსაჩენად და ზრდის, მდგრადობისა და გავლენის ახალი შესაძლებლობების გასახსნელად", — წერია ვებგვერდზე.

საქართველო დავოსის ეკონომიკურ ფორუმზე ბოლო 2024 წელს მიიღო მონაწილეობა და იქ საქართველოს ირაკლი ღარიბაშვილი წარმოადგენდა.