ჩეჩნეთის ლიდერმა რამზან კადიროვმა ოფიციალური შეხვედრის ვიდეოჩანაწერი მას შემდეგ გამოაქვეყნა, რაც მედიაში გავრცელდა ცნობები თირკმლის სავარაუდო უკმარისობის შესახებ, რასაც მან "ყალბი ინფორმაცია" უწოდა.

კადიროვმა ვიდეო ორშაბათს საკუთარ Telegram-არხზე განათავსა.

ჩეჩნეთის ლიდერმა შეხვედრაზე განაცხადა, რომ ონლაინ სივრცეში ცრუ ინფორმაციის გავრცელების წინააღმდეგ უფრო მკაცრი ზომები უნდა იქნას მიმღებული. მისი ჯანმრთელობის მდგომარეობის დამძიმების შესახებ ცნობები თავდაპირველად უკრაინულ მედიაში გავრცელდა, უკრაინის სამხედრო დაზვერვის სააგენტოზე (HUR) დაყრდნობით.

კადიროვმა განაცხადა, რომ მიუხედავად მისი რეგულარული საჯარო საქმიანობისა და რუსულ ტელევიზიასა და ონლაინ პლატფორმებზე ხშირი გამოჩენისა, პროვოკატორები კვლავ ავრცელებენ ჭორებს მისი ავადმყოფობისა და მოახლოებული სიკვდილის შესახებ.

"უნდა გავაძლიეროთ ინტერნეტში გავრცელებული ყალბი ინფორმაციის წინააღმდეგ ბრძოლის ზომები […] ამბობენ, რომ თირკმლები გამეთიშა, რომ საავადმყოფოში ვწევარ და მოსკოვიდან კერძო კლინიკის ექიმები ჩამოიყვანეს," — განაცხადა მან ჩეჩნურ ენაზე.

კადიროვმა ასევე თქვა, რომ უკვირს, როგორ სჯერათ ადამიანებს, მისი თქმით, "ნაყიდი ინფორმაციის", მაშინ როცა ისინი ტელევიზიითა და სოციალურ ქსელებში ხედავენ მას, როგორ მონაწილეობს ღონისძიებებში.

"მაშინაც კი, როცა ტელევიზიით და სოციალურ ქსელებში მხედავენ, მაინც ამტკიცებენ, რომ ავად ვარ და ვკვდები," — აღნიშნა ჩეჩნეთის ლიდერმა.

კადიროვმა ჩეჩნეთის მთავრობის მოქმედ ვიცეპრემიერის მოვალეობის შემსრულებელს — რესპუბლიკის ეროვნული პოლიტიკის, საგარეო ურთიერთობების, პრესისა და ინფორმაციის მინისტრ ახმედ დუდაევს დაავალა, გააძლიეროს ძალისხმევა მედიასივრცეში ყალბი ინფორმაციის გამოვლენის მიმართულებით.

კადიროვმა მიმართვა მედიის კრიტიკას დაურთო და მას აუდიტორიის ნდობის ბოროტად გამოყენებასა და მისი ჯანმრთელობის შესახებ არაზუსტი ინფორმაციის გავრცელებაში დასდო ბრალი. მან შესაბამის ორგანოებს მოუწოდა, გააძლიერონ დეზინფორმაციასთან ბრძოლა და ინტერნეტში არასანდო პუბლიკაციების გაფილტვრა.

უკრაინული მედიის ცნობით, HUR ამტკიცებდა, რომ ჩეჩნეთში რესპუბლიკის ხელმძღვანელის შესაძლო მემკვიდრის გამოვლენის პროცესი უკვე დაწყებულია. ამ ცნობებში პოტენციურ კანდიდატებად ჩეჩნეთის პარლამენტის სპიკერი აგომედ დაუდოვი, ვიცეპრემიერი აპტი ალაუდინოვი და კადიროვის უფროსი ვაჟი ახმატი სახელდებოდნენ.

2025 წლის 31 დეკემბერს რუსულმა დამოუკიდებელმა გამოცემამ Novaya Gazeta Europe-მა გაავრცელა ინფორმაცია, რომ კადიროვი მოსკოვში ჰოსპიტალიზებული იყო ჯანმრთელობის მკვეთრი გაუარესების გამო. გამოცემა წყაროზე დაყრდნობით იუწყებოდა, რომ კადიროვი სახელმწიფო საბჭოს სხდომაზე პირადად დასწრებას გეგმავდა და 24 დეკემბერს მოსკოვში ჩავიდა, თუმცა იმავე ღამით სასწრაფო დახმარების მანქანით პრეზიდენტის საქმეთა სამმართველოს ცენტრალურ კლინიკურ საავადმყოფოში გადაიყვანეს. წყაროს თქმით, სახელმწიფო საბჭოს სხდომაში ჩეჩნეთის მონაწილეობისთვის სარეზერვო გეგმა არ არსებობდა და ღონისძიება რესპუბლიკის დელეგაციის გარეშე გაიმართა.

Novaya Gazeta Europe-ს ადრე ასევე ჰქონდა ინფორმაცია, რომ კადიროვს 2019 წელს პანკრეასის ნეკროზი დაუდგინდა.

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.