ოცნების პარლამენტის წევრი ირაკლი ქადაგიშვილი ამერიკის მიერ 75 ქვეყნისთვის საიმიგრაციო ვიზების დამუშავების შეჩერებას გამოეხმაურა. მისი თქმით, ფაქტობრივად, აშშ საემიგრაციო ვიზებზე უარს აცხადებს და მისივე განმარტებით, საქართველოში არ არის ის ვითარება, რომ მოქალაქეები იძულებულები იყვნენ, ქვეყანა დატოვონ.

"თქვენ ახლა უყურებთ ამერიკაში საიმიგრაციო მიმართულებით რა პოლიტიკა ტარდება. ფაქტობრივად, აშშ საემიგრაციო ვიზებზე უარს აცხადებს. თქვენ იცით, რომ ტრამპმა შემოიღო ეს "ოქროს ბარათი". თუ თქვენ გინდათ, რომ აშშ-ში ცხოვრების უფლება და ა.შ. მოიპოვოთ, იქ გარკვეულ მაღალ ფინანსურ ვალდებულებებზე არის საუბარი. ზოგადად, საემიგრაციო ვიზა რას ნიშნავს?! როდესაც მოქალაქე იძულებულია დატოვოს თავისი ქვეყანა. იძულების მიზეზები შეიძლება სხვადასხვა იყოს. მე ვფიქრობ, საქართველოში არ არის ის ვითარება, ობიექტურად, რომ მოქალაქეები იძულებულები იყვნენ, ქვეყანა დატოვონ. რაც შეეხება სასწავლო მიზნით, ბიზნესის მიზნით, საქმიანი ურთიერთობის მიზნით თუ ტურისტული მიზნით ვიზებს, ეს ვიზები ჩვეულებრივად, როგორც აქამდე გაიცემოდა, ისეთივე წესით გაგრძელდება", — განაცხადა ქადაგიშვილმა (კომენტარს IPN ავრცელებს).

ცნობისთვის, აშშ-ის სახელმწიფო დეპარტამენტი 75 ქვეყნის მოქალაქეებისთვის, მათ შორის, ქართველებისთვის საემიგრაციო ვიზების დამუშავებას აჩერებს, იმ მიზნით, რომ გაამკაცროს კონტროლი იმ განმცხადებლებზე, რომლებიც შესაძლოა მომავალში "სახელმწიფო ვალდებულებად" (public charge) იქცნენ. ამის შესახებ ინფორმაციას Fox News ავრცელებს.

სახელმწიფო დეპარტამენტის მემორანდუმის მიხედვით, რომელიც პირველად Fox News Digital-მა გაავრცელა, საკონსულოს ოფიცრებს არსებული კანონის საფუძველზე ვიზებზე უარის თქმა ევალებათ, სანამ დეპარტამენტი ხელახლა შეაფასებს სკრინინგის და შემოწმების პროცედურებს.

ვიზების დამუშავების შეჩერება 21 იანვრიდან დაიწყება და განუსაზღვრელი ვადით გაგრძელდება, ვიდრე სახელმწიფო დეპარტამენტი იმიგრაციული პროცესების გადახედვას არ დაასრულებს.