სომხეთის პრემიერმინისტრმა ნიკოლ ფაშინიანმა განაცხადა, რომ მის ქვეყანას სურს, ევროკავშირის წევრი სახელმწიფო "ერთმნიშვნელოვნად და ყოველგვარი კითხვის გარეშე" გახდეს.

მან განცხადება ოთხშაბათს, ერევანში გამართული სომხეთის საერთაშორისო და უსაფრთხოების საკითხების ინსტიტუტის (AIISA) უსაფრთხოების ფორუმის ფარგლებში გამართული პანელური დისკუსიის დროს გააკეთა.

სახელმწიფო მედიასაშუალება Armenpress-ის ცნობით, ფაშინიანმა ხაზი გაუსვა პარლამენტის მიერ მიღებული კანონპროექტის მნიშვნელობას, რომელმაც ქვეყნის ევროკავშირში გაწევრიანების პროცესს მწვანე შუქი აუნთო.

"გვინდა თუ არა გავხდეთ ევროკავშირის სრულფასოვანი წევრი? დიახ, ერთმნიშვნელოვნად და ყოველგვარი კითხვის გარეშე", — განაცხადა ფაშინიანმა (Armenpress-ის მიხედვით).

მან ასევე აღნიშნა, რომ ერევანი სომხეთის ევროკავშირში გაწევრიანების ერთ "ძალიან მნიშვნელოვან და არსებით წინაპირობას" "სრულად აცნობიერებს" — ქვეყანამ ობიექტურად უნდა დააკმაყოფილოს ევროკავშირის სტანდარტები სულ მცირე 97%, 98% ან 99%-ით.

"ჩვენი სტრატეგია ასეთია: მტკიცედ და მკაფიოდ უნდა გავაგრძელოთ სომხეთის გარდაქმნა ისეთ ქვეყნად, რომელიც აკმაყოფილებს ევროკავშირის სტანდარტებს აკმაყოფილებს... როდესაც ამ სტანდარტებს დავაკმაყოფილებთ, გვექნება ორი ვარიანტი: ან მიგვიღებენ ევროკავშირის წევრად, ან — არა", — თქვა მან.

ფაშინიანის თქმით, იმ შემთხვევაშიც კი, თუ ევროკავშირი სომხეთის გაწევრიანებაზე უარს იტყვის, ქვეყანა მაინც გახდება "თანამედროვე სახელმწიფო, რომელიც ევროპულ სტანდარტებთან იქნება შესაბამისობაში".

შემდეგ ის შეეხო სომხეთის მოსკოვის ხელმძღვანელობით მოქმედ ევრაზიულ ეკონომიკურ კავშირის წევრობას (EAEU) და განაცხადა, რომ მისი მთავრობა :სრულად აცნობიერებს, რომ შეუძლებელია ერთდროულად ორივე ბლოკის წევრობა", თუმცა დაამატა, რომ სომხეთისთვის ჯერ კიდევ არსებობს "სივრცე" EAEU-ში დარჩენისთვის.

"შესაბამისად, იქამდე, სანამ თავსებადობა შესაძლებელია, ჩვენ გავაგრძელებთ ევრაზიული ეკონომიკური კავშირის წევრობას. როდესაც შეუთავსებლობა გარდაუვალი გახდება, გადაწყვეტილებას მივიღებთ სომხეთის მოქალაქეებთან ერთად, რესპუბლიკის მოსახლეობის თავისუფალი ნების გამოხატვის საფუძველზე", — განაცხადა მან.

რუსეთსა და ევრაზიულ ეკონომიკურ კავშირს არაერთხელ აღუნიშნავთ, რომ სომხეთის ევროკავშირში გაწევრიანების მისწრაფებები EAEU-ს წევრობასთან შეუთავსებელია.

რადიო თავისუფლების (RFE/RL) ცნობით, 10 იანვარს რუსეთის ვიცეპრემიერმა ალექსეი ოვერჩუკმა განაცხადა, რომ რუსეთი სომხეთის მიერ ევროკავშირში გაწევრიანებისკენ მიმართული კანონპროექტის მიღებას აღიქვამს როგორც "სომხეთის ევრაზიული ეკონომიკური კავშირიდან გასვლის დასაწყისს".

"რუსეთის ფედერაცია სომხეთის მიმართ თავის ეკონომიკურ პოლიტიკას ამ გარემოების გათვალისწინებით ჩამოაყალიბებს", — თქვა მან.

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.