გაეროს ექსპერტების განცხადებით, ავღანეთში ბოლო თვეებში მკვეთრად გაიზარდა ქალების ფუნდამენტური უფლებებისა და თავისუფლებების დარღვევა.

რატომ არის მნიშვნელოვანი: გაეროს განცხადებით, ქალთა მიმართ მიღებული დისკრიმინაციული ზომები, რომლებიც თალიბანის დე ფაქტო ხელისუფლების მიერ დაწესდა, საერთაშორისო სამართლის მიხედვით უნდა იქნას გამოძიებული, როგორც გენდერული დევნა.

  • ორგანიზაცია მოუწოდებს საერთაშორისო საზოგადოებას, მიიღონ ზომები ავღანეთში პასუხისმგებელი პირების გამოსაძიებლად.
  • მოხდეს მათი გასამართლება შესაბამის საერთაშორისო და ექსტრატერიტორიულ იურისდიქციებში.
  • გაზარდოს მხარდაჭერა ავღანელი უფლებადამცველების, განსაკუთრებით ქალებისა და გოგონების მიმართ.
  • პასუხად, თალიბანის საგარეო საქმეთა სამინისტროს სპიკერმა აბდულ ქაჰარ ბალხიმ განაცხადა, რომ თალიბანის ადმინისტრაცია გაეროს და სხვა დასავლეთის ოფიციალური პირების განცხადებას მიიჩნევს "ისლამის შეურაცხყოფად და საერთაშორისო პრინციპების დარღვევად".

დეტალები: ავღანეთში ქალებს არ აქვთ საშუალო და უმაღლესი განათლების მიღების შესაძლებლობა და ეკრძალებათ ისეთ საჯარო ადგილებში შესვლა, როგორიცაა პარკები და სპორტული დარბაზები.

  • ორგანიზაციის შეფასებით, პარკებში ქალების არ შეშვება ასევე ნიშნავს ბავშვებისთვის დასვენებისა და ვარჯიშის შესაძლებლობის შეზღუდვას.

ამასთანავე, თალიბანის ოფიცრებმა სასტიკად სცემეს კაცები, რომელთა გვერდითაც ქალები თავსაბურავის გარეშე ან ფერადი ტანსაცმლით შენიშნეს.

  • გაეროს შეფასებით, ეს კაცების ერთგვარი წახალისებაა გააკონტროლონ ქალების გარეგნობა, ჩაცმულობა, ქცევა და გადაადგილება, რაც საბოლოო ჯამში ძალადობის ნორმალიზებას უწყობს ხელს.

ავღანეთში ქალთა უფლებადამცველებს, რომლებიც მშვიდობიანად აპროტესტებენ ქალებისა და გოგოების მიმართ გაზრდილ შეზღუდვებს, ხშირად სცემენ და აპატიმრებენ.

  • აქტივისტი ზარიფა იაკობი და ოთხი კაცი კვლავ თალიბანის დაზვერვის დეპარტამენტის ტყვეობაში არიან.