სათემო რადიო მარნეული აცხადებს, რომ პოლიტიკური პარტია ახალი საქართველოს წარმომადგენელმა მარნეულში, ქამრან მამედოვმა რადიოს ჟურნალისტს შეურაცხყოფა მიაყენა.

როგორც მედიასაშუალება აცხადებს, 29 მაისს, რადიო მარნეულის ჟურნალისტის ფერვინ აბდულაევის საავტორო გადაცემაში Uzun İncə Bir Yol (ცხოვრების საინტერესო გზა) მიწვეული იყო პარტია ახალი საქართველოს წევრი ქამრან მამედოვი, საუბრის თემა კი ახალგაზრდების პრობლემები იყო. რადიო მარნეულის თქმით, წინა წლის წინასაარჩევნო პერიოდში მათი მედია პლატფორმა ღია იყო მამედოვისთვის ისევე, როგორც სხვა პარტიების წარმომადგენლებისთვის, რადგან სათემო რადიოს ამოცანა და მოვალეობა საარჩევნო პერიოდში ყველა პარტიასა და ყველა კანდიდატზე ინფორმაციის მიწოდებაა, ამომრჩევლების მხრიდან ინფორმირებული არჩევანის უზრუნველსაყოფად.

რადიო ამ ეტაპზე მაუწყებლობს ინტერნეტის საშუალებით (ლაივსტრიმი), ასევე სოციალურ ქსელის, კერძოდ, facebook live-ით. ამ ორი სიგნალით ინტერვიუ პირდაპირ ეთერში გადაიცემოდა.

"ინტერვიუში ჟურნალისტმა ბავშვთა ფუნდამენტურ უფლებაზე – განათლების მიღებაზე კითხვა დასვა, კერძოდ, ჩვენმა რეპორტიორმა ყურადღება არასრულწლოვანთა მიერ ზოგადსაგანმანათლებლო სკოლის სრული კურსის დაუმთავრებლობაზე გაამახვილა – გადაცემის წამყვანი დაინტერესდა, თუ როგორ ახსნას მოუძებნიდა ამ პრობლემას მიწვეული სტუმარი. რედაქციისთვის მოულოდნელად, მამედოვმა კითხვის მოსმენისთანავე ჟურნალისტს სიტყვიერი შეურაცხყოფა მიაყენა – როგორც აღმოჩნდა, მამედოვის აზრით, კითხვა ადრეული ქორწინების საკითხს შეეხებოდა (ცხადია, ერთ-ერთი მიზეზი იმისა, თუ რატომ არ ასრულებენ სკოლას არასრუწლოვანი მოსწავლეები, სწორედ ადრეული ქორწინებაა და ამ საკითხის განხილვას ჩვენს ერთ-ერთ მოვალეობად მივიჩნევთ, თუმცა ამ კონკრეტულ შემთხვევაში ჩვენ განათლების მიღების უფლებაზე გვინდოდა გაგვემახვილებინა ყურადღება და გვაინტერესებდა პოლიტიკური პარტიის წარმომადგენლის მოსაზრება).

სტუმრის მხრიდან შეურაცხყოფისა და ხმამაღალი შეძახილის ფონზე, ეთერი ჩაიშალა, მუქარის შინაარსის შემცველი ტექსტი მამედოვმა ამჯერად საკუთარ ფეისბუქ გვერდზე გამოაქვეყნა, მეტიც, ახალი საქართველოს წევრმა ფეისბუქ ლაივის საშუალებით გააგრძელა ჟურნალისტის შეურაცხყოფა და ადრეული ქორწინების ფაქტების წახალისება", - აცხადებს რადიო მარნეული.

მათივე თქმით, სათემო რადიო მარნეული ყოველთვის შეუწყობს ხელს ისეთი დისკუსიის წარმართვას, რომლის მიზანი თემის ყველა წევრის კონსტიტუციით გარანტირებული უფლების განხორციელებას ეხება:

"ჩვენ ვართ მედიაორგანიზაცია, რომელსაც გვაკისრია პასუხისმგებლობა, საზოგადოებაში ყველაზე მოწყვლადი ჯგუფების ინტერესი დავიცვათ და მივაწვდინოთ ხმა ხელისუფლებას პრობლემათა მოსაგვარებლად, ამ პროცესის დაკვირვება და კონტროლი კი ჩვენი მოვალეობაა.

რადიო მარნეული ვერ წაახალისებს ძალადობრივ, შეურაცხმყოფელ და ადამიანის უფლებების შემლახავ ქმედებას არცერთი მოწვეული სტუმრის მხრიდან, მით უმეტეს, პოლიტიკური პარტიების წევრების მხრიდან, რომელთაც ამბიცია აქვთ, ჰქონდეთ უმრავლესობის მხარდაჭერა და მართონ თემი, მუნიციპალიტეტი, რეგიონი, ქვეყანა".

რადიო მოუწოდებს პარტია ახალი საქართველოს წევრს საჯაროდ ბოდიშის მოხდისკენ და ითხოვს ახსნა-განმარტებას პარტიის ცენტრალური და ადგილობრივი ოფისების მხრიდან: ასეთი ქმედება დამოუკიდებელი მედიის მიმართ თანამედროვე დემოკრატიულ სტანდარტებს არ შეესაბამება.

"ჩვენ ისევ გავაგრძელებთ მწვავე საკითხებზე დისკუსიის გამართვას, მიუხედავად იმისა, მოსწონთ ეს ამა თუ იმ პოლიტიკური პარტიებისა თუ ხელისუფლების წარმომადგენლებს თუ არა, რადგან ვემსახურებით საზოგადოებას და ვმუშაობთ თემისთვის", - აცხადებს რადიო მარნეული.

On.ge შეეცდება ქამრან მამედოვისა და პარტია ახალი საქართველოს პოზიცია აღნიშნულ ფაქტთან დაკავშირებით უახლოეს პერიოდში შემოგთავაზოთ.