ბერლინში უკრაინის აღდგენის, რეკონსტრუქციის და მოდერნიზაციის საერთაშორისო ექსპერტთა კონფერენცია იმართება. სწორედ ამ კონფერენციაზე ისაუბრა ევროკომისიის პრეზიდენტმა.

რატომ არის მნიშვნელოვანი: რუსეთის არმიამ უკრაინის ინფრასტრუქტურის დიდი ნაწილი გაანადგურა.

  • უკრაინის შეფასებით, ომისგან გამოწვეული ზარალი 750 მილიარდ ევროს უდრის.
  • ექსპერტთა კონფერენცია არ არის გადაწყვეტილებების მიმღები ორგანო და გაჟღერებულ ინიციატივებს სარეკომენდაციო ხასიათი აქვს.

დეტალები: ევროკომისიის პრეზიდენტის ურსულა ფონ დერ ლაიენის განცხადებით, ევროკავშირის ქვეყნები განიხილავენ უკრაინისთვის ყოველთვიურად 1.5 მლრდ ევროს დახმარების გამოყოფას, შესაბამისად, 2023 წელს უკრაინისთვის ფინანსური დახმარება 18 მლრდ ევროს ფარგლებშია მოსალოდნელი.

  • როგორც უკრაინის პრემიერმინისტრმა, დენის შმიგალმა განაცხადა, უკრაინას მომავალ წელს 38 მლრდ დოლარი სჭირდება ბიუჯეტის მიმდინარე ხარჯების დასაფარად.
  • მიმდინარე წელს უკრაინის თვიური ბიუჯეტის დეფიციტი თვეში 4-5 მლრდ დოლარად იყო შეფასებული, რაც უკრაინამ საერთაშორისო პარტნიორების ფინანსური დახმარებით და ეროვნული ბანკის მიერ გრივნას გამოშვებით დაფარა.

ზელენსკის შეფასება: უკრაინის აღდგენის და მოდერნიზაციის საერთაშორისო ექსპერტთა კონფერენციაზე უკრაინის პრეზიდენტი ვიდეოზარით ჩაერთო.

  • ზელენსკის თქმით, კრიტიკულად მნიშვნელოვანია დაიწყოს ინფრასტრუქტურის აღდგენა ახლავე, როცა რუსული ტანკები გეგმურად ანადგურებენ უკრაინის ქალაქებს.
  • "ჩვენ შევიმუშავეთ კრიტიკული ინფრასტრუქტურის აღდგენის გამჭვირვალე გეგმა, ეს ის არის რაც ახლა უკრაინისთვის სასიცოცხლო მნიშვნელობისაა. არც ხვალ, არც მომავალ წელს, არც ბრიტანეთში კონფერენციაზე. ახლავე!"
  • "სწრაფი აღდგენის გეგმისთვის საჭიროა 17 მლრდ დოლარი. საუბარია სკოლებზე, საავადმყოფოებზე, საზოგადოებრივ ტრანსპორტსა და ენერგეტიკულ ინფრასტრუქტურაზე."

უკრაინის აღდგენის ფონდი: პრეზიდენტის განცხადებით, საჭიროა შეიქმნას ფინანსური საკოორდინაციო პლატფორმა, რომელიც ყველა ძალისხმევას მიმართავს უკრაინის აღდგენაზე საომარი მოქმედებების დასრულების შემდეგ.

  • ამიტომ, უკრაინის რეკონსტრუქციაში პარტნიორების ჩართვის პროცესის დაჩქარების მიზნით, ზელენსკის სურს უკრაინის აღდგენის ფონდის, როგორც საკვანძო ინსტიტუტის შექმნა.
  • ფონდის სამეთვალყურეო საბჭოს 75% დონორი ქვეყნების წარმომადგენლებისგან დაკომპლექტდება.
  • ფონდი მომავალი თვიდან დაიწყებს მუშაობას.