საქსტატის მონაცემებით, იანვარ-სექტემბერში რუსეთში ექსპორტი 11.5%-ით $423 მლნ-დან $473 მლნ-მდე, ხოლო იმპორტი $720 მლნ-დან $1.244 მლრდ-მდე გაიზარდა. მთლიანობაში 9 თვეში სავაჭრო ბრუნვამ (ექსპორტისა და იმპორტის ჯამი) $1.717 მლრდ-ს მიაღწია.

რატომ არის ეს მნიშვნელოვანი: 2022 წლის იანვარ-სექტემბერში ათი უმსხვილესი საექსპორტო ქვეყნის წილმა საქართველოს მთლიან ექსპორტში 79.7% შეადგინა. უმსხვილესი საექსპორტო სამეულში ჩინეთი, აზერბაიჯანი და რუსეთი არიან.

  • რუსეთი არასანდო სავაჭრო პარტნიორია — როგორც საქართველოს, ასევე, სხვა სახელმწიფოების წინააღმდეგ, არაერთხელ ჰქონია საბოტაჟის მცდელობა.
  • მაგალითად, 2006 წელს ფალსიფიცირების საბაბით რუსულ ბაზარზე ქართული ღვინო და მინერალური წყლები აიკრძალა.

ექსპორტი: საქსტატის ცნობით, ყელაზე მეტად, $12 მლნ-დან $46 მლნ-მდე რუსეთში მსუბუქი ავტომობილების ექსპორტი, რეალურად რეექსპორტი (ერთ ქვეყანაში ნაყიდი პროდუქციის მესამეში გადაყიდვა) გაიზარდა.

  • $95 მლნ-დან $109 მლნ-მდეა გაზრდილი ღვინის გაყიდვებიც;
  • $24 მლნ-დან $41 მლნ-მდე კი სპირტიანი სასმელების ექსპორტი.

იმპორტი: საწვავის შემთხვევაში 352%-იანი ზრდა ფიქსირდება. გარდა იმისა, რომ მსოფლიო ბაზარზე ნავთობი გაძვირდა — შედარებით დაბალი ფასისა და მოგების მაღალი მარჟის მიღების გამო ნავთობიმპორტიორებმა გადამუშავებული საწვავის შემოტანა რუსეთიდან გაზარდეს.

  • თუ რუსეთის წილი ნავთოპროდუქტების იმპორტში გასული წლის ანალოგიურ პერიოდში 16.6%-ს შეადგენდა, წელს 42%-ს გადააჭარბა.
  • უფრო კონკრეტულად, 2021 წლის იანვარ-სექტემბერში საქართველომ რუსეთისგან $96 მლნ-ის საწვავი შეიძინა, 2022 წლის იანვარ-სექტემბერში — $431 მლნ-ის.
  • საწვავის გარდა $188 მლნ-ითაა გაზრდილი რუსეთიდან სხვა დანარჩენი პროდუქციის იმპორტიც.

ფართო სურათში: მიმდინარე წელს სავაჭრო ბრუნვა მხოლოდ რუსეთთან არ გაზრდილა.

  • მთლიანობაში ექსპორტი 37.4%-ით $4.097 მლრდ-მდე გაიზარდა;
  • იმპორტი — 34.4%-ით $9.515 მლრდ-მდე;
  • ხოლო სავაჭრო ბრუნვა — 35.3%-ით $13.612 მლრდ-მდე.