პრეზიდენტი შინაგან საქმეთა მინისტრს შეხვდა და ქვეყნის წინაშე არსებული გამოწვევები განიხილეს.

რატომ არის მნიშვნელოვანი: მობილიზაციის გამოცხადების შემდეგ რუსეთის მოქალაქეების ნაწილი საქართველოში გამოქცევას ცდილობს. ლარსის გამშვები პუნქტთან რამდენიმე დღეა დაახლოებით 13-15-კილომეტრიანი საცობებია.

• რუსულ მედიებში გავრცელებული ინფორმაციით, საზღვარი გადმოკვეთა დაახლოებით 250 000-მა პირმა, თუმცა შს მინისტრი ამას ტყუილს უწოდებს.
• ვახტანგ გომელაური ამბობს, რომ მობილიზაციის გამოცხადების შემდეგ გადმომსვლელთა მაჩვენებელმა, წინა დღეებთან შედარებით 40-45%-ით მოიმატა.
• ჩრდილოეთ ოსეთის ვიცე-პრემიერის განცხადებით, ბოლო ერთი კვირის განმავლობაში ზემო ლარსის გამშვებ პუნქტზე ორივე მიმართულებით საზღვარი 37 500 ათასმა მანქანამ და 115 200 ადამიანმა გადაკვეთა.

დეტალები: პრეზიდენტის ადმინისტრაციის ცნობით, ზურაბიშვილი მიესალმა უწყების მიერ ინფორმაციის გავრცელებას რუსეთიდან საქართველოში მოქალაქეების შემოსვლასთან დაკავშირებით.

• "მნიშვნელოვანია, ხელისუფლების მხრიდან გამოყენებული იყოს ყველა მექანიზმი, მათ შორის, ეროვნული უსაფრთხოების საბჭოს ფორმატიც, რათა ამ საკითხზე საზოგადოებაში აღარ დარჩეს კითხვები, ჰქონდეს განცდა, რომ რისკები გათვალისწინებული და ყველა ბერკეტი გამოყენებულია", — აცხადებს ადმინისტრაცია.

მობილიზაციის გამოცხადებამდე: შსს აქვეყნებს ბოლო 10 დღის მონაცემებს. მობილიზაციის ამოქმედებამდე, საქართველოს საზღვარი ყველა გამშვები პუნქტიდან გადმოკვეთა და გადაკვეთა:

• 17 სექტემბერს: 6 986 — 7 406;
• 18 სექტემბერს: 6 606 — 6 743;
• 19 სექტემბერს: 6 411 — 6 782;
• 20 სექტემბერს: 5 603 — 6 199 პირმა;

მობილიზაციის გამოცხადების შემდეგ, მონაცემები გაზრდილია. მაგალითად, 21 სექტემბერის რუსეთიდან საზღვარი გადმოკვეთა 6 402-მა და გადაკვეთა 6 011-მა პირმა. დანარჩენ დღეებში შემოსულთა და გასულთა სტატისტიკა ასეთია:

• 22 სექტემბერს: 6 150 — 6 050;
• 23 სექტემბერს: 9 307 — 6 214;
• 24სექტემბერს: 9 330 — 6 249;
  25 სექტემბერს: 11 143 — 5 519;
• 26 სექტემბერს: 10 804 — 4 947.

შსს-ს განცხადებით, სასაზღვრო გამშვებ პუნქტში მუდმივ რეჟიმში იმყოფება სახელმწიფო უსაფრთხოების სამსახურის შესაბამისი დანაყოფი, უსაფრთხოების უზრუნველყოფისა და რისკების გამოვლენის მიზნით.

• მათივე თქმით, სასაზღვრო კონტროლის პროცედურები მიმდინარეობს განსაკუთრებული დაკვირვებით, საქართველოს მოქმედი კანონმდებლობის სრული დაცვით.
• უწყებაში ამბობენ, რომ ბოლო პერიოდში მომატებულია იმ მოქალაქეთა რაოდენობაც, რომელთა შემოშვებაც კანონმდებლობით გათვალისწინებული მიზეზების გამო არ ხდება.
• ამ საკითხზე დღეს ისაუბრა მინისტრმაც და ასე განმარტა: "ლოგიკურია, თუ 100 კაცში 10-ს უკან ვაბრუნებდით, ახლა 1 000 კაცში პირობითად 100 გაბრუნდება უკან, მათემატიკაა ჩვეულებრივი", — განაცხადა მან.

შემოშვებაზე უარის მიზეზი: უწყება განმარტავს, რომ კანონის თანახმად, საქართველოში შემოსვლისას ნებისმიერი უცხო ქვეყნის მოქალაქე გადის ინსპექტირებას სასაზღვრო გამტარ პუნქტში, რის შედეგადაც ის ან დადებით, ან უარყოფით პასუხს იღებს.

• მათი თქმით, უცხო ქვეყნის თითოეული მოქალაქის ინსპექტირება/გამოკითხვა საერთაშორისოდ აღიარებული საუკეთესო პრაქტიკის შესაბამისად ხორციელდება და შემოსვლის თანხმობის ან უარის გადაწყვეტილებას მესაზღვრე სხვადასხვა ფაქტორისა და გარემოებების შეფასების შედეგად იღებს.
• მაგალითად, უწყება ამბობს, რომ მესაზღვრე ითვალისწინებს პირის ხელთ არსებული დოკუმენტაციის შესაბამისობას მგზავრობის მიზნობრიობასთან, საქართველოში ყოფნის პერიოდში და საქართველოდან გამგზავრებისას ფინანსური სახსრების საკმარის ოდენობას, წარსულში ქვეყანაში ყოფნის ვადებს და ა.შ.
• მათივე თქმით, თუ დარღვეულია ეს სტანდარტი, სამართალდამცველები უცხო ქვეყნის მოქალაქეს ადგილზე უმარტავენ უარის თქმის შესაძლო მიზეზებს და ამ გადაწყვეტილების გასაჩივრების პირობებს