დუა ლიპა კოსოვოს მოქალაქე გახდა. ბრიტანეთში მცხოვრები კოსოვოელი ალბანელების ოჯახში დაბადებული პოპვარსკვლავი ახლა უკვე სამი ქვეყნის მოქალაქეობას ფლობს: ალბანეთის, გაერთიანებული სამეფოსი და კოსოვოსი. ამ უკანასკნელის მოქალაქეობა ლიპას საზეიმო ვითარებაში გადასცა ქვეყნის პრეზიდენტმა ვიოსა ოსმანიმ, რომელმაც მას "კოსოვოს მარგალიტი" უწოდა. ცერემონიაზე მუსიკოსს ბავშვთა გუნდიც შეეგება, რომელმაც მისი ჰიტი Levitating შეასრულა.

ოსმანის თქმით, დუა ლიპა კოსოვოს ისტორიაში ერთ-ერთი ყველაზე გამორჩეული კულტურული ფიგურაა და ისინი მუდამ მადლიერები იქნებიან იმ ყველაფრისთვის, რასაც მომღერალი აკეთებს.

"დუა და კოსოვო ყოველთვის განუყოფლები იყვნენ", — აცხადებს კოსოვოს პრეზიდენტი, — "მან სიამაყით, სიძლიერითა და დიდებულებით მიიტანა ჩვენი ამბავი მსოფლიოს უდიდესი სცენებიდან მილიონობით ადამიანის გულებამდე".

თავად ლიპა კი ამბობს, რომ ისეთი განცდა აქვს, "თითქოს მისი ორი ნაწილი გაერთიანდა".

"მე ეს ქვეყანა მიყვარს", — აღნიშნავს მუსიკოსი, — "ეს ამბავი კი ჩემთვის და ჩემი ოჯახისათვის ძალიან ბევრს ნიშნავს".

გრემის სამგზის მფლობელი დუა ლიპა, რომელიც ყოფილი იუგოსლავიიდან ლონდონში ჩასული მიგრანტების ოჯახში დაიბადა, მოზარდობისას მცირე ხნით ცხოვრობდა კიდეც სამშობლოში — მას შემდეგ, რაც კოსოვომ 2008 წელს დამოუკიდებლობა გამოაცხადა, იგი ოჯახთან ერთად დაბრუნდა დედაქალაქ პრიშტინაში.

პოპვარსკვლავი კოსოვოსადმი თავის მხარდაჭერას ყოველთვის ღიად გამოხატავდა. მისი ინიციატივით, კოსოვოში საქველმოქმედო ფონდი და ყოველწლიური მუსიკალური ფესტივალიც დაფუძნდა. 2022 წელს ვიოსა ოსმანიმ მომღერალს კოსოვოს საპატიო ელჩის სტატუსიც მიანიჭა. ამავე წელს მიენიჭა მომღერალს ალბანეთის მოქალაქეობა.

წლევანდელი მონაცემებით, კოსოვოს დამოუკიდებლობა აღიარებული აქვს გაეროს 193 წევრი ქვეყნიდან ნახევარზე მეტს, 108 სახელმწიფოს, მათ შორის, ევროკავშირის წევრების უმრავლესობას, გაერთიანებულ სამეფოს და აშშ-ს. საქართველოს, რუსეთს, ჩინეთს, რამდენიმე აფრიკულ და ლათინოამერიკულ ქვეყანას კი კოსოვო დამოუკიდებლად არ უცნიათ.

თუ მუსიკა შენი ცხოვრების განუყოფელი ნაწილია და ამ თემაზე მეტის გაგება გინდა, შემოგვიერთდი ჯგუფში ერთი სიმღერაც და...