საკანონმდებლო ცვლილებებზე საკონსტიტუციო სარჩელი უკვე წარდგენილი აქვთ მოსამართლეთა ჯგუფს და სახალხო დამცველს.

რატომ არის მნიშვნელოვანი: პარლამენტმა საერთო სასამართლოების შესახებ საქართველოს ორგანულ კანონში ცვლილების შეტანის თაობაზე კანონპროექტი მესამე მოსმენით 2021 წლის 30 დეკემბერს დაამტკიცა.

  • მის მიღებას ეწინააღმდეგებოდნენ თავად მოსამართლეები და არასამთავრობო ორგანიზაციები.
  • NGO-ები პრეზიდენტს მოუწოდებდნენ ვეტო დაედოთ საერთო სასამართლოების შესახებ კანონში შესატან ცვლილებები, თუმცა სალომე ზურაბიშვილმა კანონს ხელი მოაწერა.

დეტალები: საკონსტიტუციო სარჩელის წარდგენის უფლებამოსილება, მინიმუმ 30 დეპუტატს აქვს და სარჩელზე ხელმოწერასთან დაკავშირებით, კონსულტაციები ინიციატორი დეპუტატების თქმით, საპარლამენტო ოპოზიციის ყველა წევრთან იმართება.

  • სარჩელი დემოკრატიის ინდექსი — საქართველოს და დამოუკიდებელი იურისტების ჯგუფის წევრების მიერ მომზადება.
  • საკონსტიტუციო სასამართლოში მოსარჩელეები არიან ერთიანი ნაციონალური მოძრაობის, ლელოს, სტრატეგია აღმაშენებლის, პარტია საქართველოსთვის წევრები და დამოუკიდებელი დეპუტატები.

დემოკრატიის ინდექსი — საქართველოს განცხადებით, კანონში ცვლილებები არღვევს მოსამართლეთა კონსტიტუციურ უფლებებს, ზღუდავს ინდივიდუალურ მოსამართლეთა დამოუკიდებლობის გარანტიებს და სასამართლოს მმართველ გავლენიან ჯგუფს უზრდის ბერკეტებს ინდივიდუალურ მოსამართლეთა შესავიწროებლად.

  • "კანონში შეტანილი ცვლილებებით მოსამართლეებს შეეზღუდათ გამოხატვის თავისუფლება, თანამდებობის დაკავების უფლება, იუსტიციის საბჭოს მოსამართლე წევრებს მიეცათ შეუზღუდავი შესაძლებლობა მიავლინონ მოსამართლე სხვა სასამართლოში მისი თანხმობის გარეშე, მის მიმართ დაიწყონ დევნა ბუნდოვანი საფუძვლებით".
  • "კანონი ვერ აკმაყოფილებს განჭვრეტადობის სტანდარტს და აძლევს იუსტიციის საბჭოს მოსამართლე წევრებს თვითნებობის, კანონის შერჩევითად, არანამდვილი მიზნებისთვის გამოყენების შესაძლებლობას".

აქტივიდან: 5 მოსამართლის მიერ წარდგენილი სარჩელი 9 ნორმას მოიცავს, რაც სასამართლოების შესახებ კანონის ახალი რედაქციის რამდენიმე პუნქტშია თავმოყრილი. მოსარჩელეები სადავოს ხდიან დისციპლინურ საკითხებზე გადაწყვეტილების მიღების საფუძვლებსა და მათ კონსტიტუციურობას.

  • მოსამართლეები წერენ, რომ ეს ნორმები საერთოდ არ ითვალისწინებს მოსამართლის ნებას და ეფექტურ ჩართულობას გადაწყვეტილები მიღების პროცესში.