მერი ჟურნალისტსა და არხს 5 ივლისს გადაცემაში ნათქვამი ფრაზის გამო უჩივის.

რატომ არის მნიშვნელოვანი: მმართველი გუნდი კრიტიკულ მედიებს ხშირად ესხმის თავს, მათი განცხადებები კი ჟურნალისტებზე ძალადობის შემთხვევებს ახალისებს.

  • ვინაიდან, ქართული ოცნება მედიების წინააღმდეგ იყენებს სანქცირების მექანიზმებსაც, შესაძლოა, პარტიის გენერალური მდივნის ეს დავაც ასე იყოს აღქმული.
  • ტელეკომპანიაში ამბობენ, რომ კალაძის მოთხოვნა დაუსაბუთებელია და მხოლოდ ტელევიზიის დისკრედიტაციას და მისთვის უზომოდ დიდი პასუხისმგებლობის დაკისრებას ემსახურება.

დეტალები: კალაძის ადვოკატის, დიმიტრი გაბუნიას თქმით, მერი "პატივის, ღირსებისა და საქმიანი რეპუტაციის შემლახველი ცნობების" უარყოფასა და მორალური ზიანის სახით 100 000 ლარის ანაზღაურებას ითხოვს.

  • როგორც ის ამბობს, გადაცემაში მამულაშვილმა თქვა, "სიმართლესთან შეუსაბამო" ინფორმაცია, რომ კალაძემ "ერთ-ერთ ტენდერში ჯიბეში ჩაიდო 60 მილიონი".
  • TV პირველის იურისტი, ქეთი ზანდუკელი აღნიშნავს, რომ ინფორმაცია პირველად არა მამულაშვილის ეთერში, არამედ 2019 წლის 18 მაისს გავრცელდა და მას შემდეგ არაერთმა წყარომ, თუ პირმა საჯარო სივრცეში გაიმეორა.

კალაძე ამბობს, რომ "ძალიან ბევრ სიბინძურეს, ბევრ ცილისწამებას, ტალახის სროლას და შეურაცხყოფას" ითმენს, შესაბამისად, ყველაფერი სასამართლოს გზით უნდა გადაწყდეს.

  • მისი თქმით, ჟურნალისტს მოუწევს მტკიცებულებების წარდგენა;
  • ხოლო თუ საქმეს მიიღებს, ქართული ოცნების გენერალური მდივანი ამტკიცებს, რომ თანხას ქველმოქმედებისთვის გამოიყენებს.