2026 წლის ევროვიზიის გარშემო დრამა ისევ გრძელდება და საქმე კვლავაც ისრაელის მონაწილეობას ეხება. წლევანდელ კონკურსს, საიუბილეო 70-ე ევროვიზიას, ხუთმა ქვეყანამ უკვე გამოუცხადა ბოიკოტი ისრაელის დაშვების გამო. მაისში, ავსტრიის დედაქალაქ ვენაში დაგეგმილ ევროფესტივალზე ესპანეთი, ისლანდია, ირლანდია, ნიდერლანდები და სლოვენია მონაწილეობას არ მიიღებენ. თუმცა, იმ ქვეყნებშიც, რომლებიც მონაწილეებს შორის არიან, ისევ ისმის ბოიკოტისკენ მოწოდებები. მეტიც, წლევანდელი ევროფესტივალის რამდენიმე მონაწილე ღიად გამოხატავს უკმაყოფილებას ისრაელის კონკურსზე ასპარეზობის გამო.

მათ შორისაა შვედეთის წარმომადგენელი ფელისია ერიკსონი. 24 წლის მომღერალმა სულ ცოტა ხნის წინ შვედეთის შიდაშესარჩევი კონკურსი, მელოდიფესტივალენი, მოიგო და ევროვიზიის საგზური გაინაღდა. მისი საკონკურსო სიმღერა, My System, ევროვიზიის გულშემატკივრების ერთ-ერთი ფავორიტია — ფანების აპლიკაციაში My Eurovision Scoreboard შვედეთი მესამე ადგილს იკავებს, ბუქმეიკერების პროგნოზში კი მეშვიდე პოზიციაზეა. მელოდიფესტივალენის მოგებიდან მალევე, ჟურნალისტმა ფელისიას ჰკითხა, რას ფიქრობს ისრაელის ევროვიზიაზე მონაწილეობის შესახებ.

"არ მგონია, კონკურსზე ისრაელის დაშვება სწორი იყოს", — აღნიშნავს მომღერალი, — "ვფიქრობდი, თავად როგორ მოვქცეულიყავი და წავსულიყავი თუ არა საერთოდ [ევროვიზიაზე]. და გადავწყვიტე, რომ წავალ და ყველაფერს გავაკეთებ, რომ მათ არ მოიგონ".

გასულ 2025 წელს კი ისრაელი ძალიან ახლოს იყო მოგებასთან. ისრაელელი მომღერალი იუვალ რაფაელი ტელემაყურებლის რჩეული გახდა და, საბოლოოდ, კონკურსზე მეორე ადგილი დაიკავა. თუმცა, სწორედ ტელემაყურებლის აქტივობასთან დაკავშირებით, მონაწილე ქვეყნებს არაერთი კითხვა გაუჩნდათ და მოითხოვეს, ხმის მიცემის პროცესი უფრო გამჭვირვალე და რეგულირებული ყოფილიყო, შედეგები კი — გადამოწმებული და დაცული. ამ მოთხოვნებს ასახავს ევროვიზიის ორგანიზატორების გადაწყვეტილება, რომლითაც კონკურსის რამდენიმე წესი შეიცვალა.

• თითოეულ ტელემაყურებელს მხოლოდ 10-ჯერ ექნება ხმის მიცემის საშუალება და არა 20-ჯერ, როგორც წინათ იყო;
• ტელემაყურებელთან ერთად, კონკურსის ნახევარფინალურ ტურებში ჟიური ისევ მისცემს ხმას (როგორც 2023 წლამდე იყო);
• მონაწილეებს აეკრძალებათ, ჩაერთონ კონკურსმიღმა პირების, მათ შორის, სამთავრობო უწყებების პრომოკამპანიებში.

კონკურსის ახალმიღებული წესები მონაწილეებს ასევე უკრძალავს ევროვიზიის პლატფორმის გამოყენებას პოლიტიკური განცხადებების გასაკეთებლად. სწორედ ამ აკრძალვაზე აპელირებს ისრაელის საზოგადოებრივი მაუწყებელი, რომელიც, ადგილობრივი მედიის ცნობით, შვედი მომღერლის განცხადების შემდეგ განიხილავს, საკითხზე ოფიციალური საჩივრით მიმართოს ორგანიზატორებს.

"ისრაელის საზოგადოებრივი მაუწყებელი მუშაობს იმისთვის, რომ ევროვიზიის სიმღერის კონკურსი ნებისმიერი პოლიტიკური დისკუსიის მიღმა დარჩეს და მხოლოდ მუსიკაზე იყოს ფოკუსირებული", — ნათქვამია არხის განცხადებაში.

თუმცა, ფელისია წლევანდელი ევროვიზიის ერთადერთი მონაწილე არაა, რომელიც ისრაელის კონკურსზე მონაწილეობას ეწინააღმდეგება. შიდაშესარჩევი კონკურსის მოგებამდე ცოტა ხნით ადრე, ფინეთის წარმომადგენელმა ლინდა ლამპენიუსმა მსგავსი განცხადება გააკეთა.

"თუკი ფინეთის ევროვიზიაზე წარდგენის შესაძლებლობა მოგვეცემა, ამას მუსიკისა და ადამიანობისთვის გავაკეთებთ", — დაწერა ლამპენიუსმა, — "მიგვაჩნია, რომ ისრაელის ევროვიზიაზე დაშვება არასწორია, ხოლო რაც პალესტინაში ხდება — არაადამიანური და დასაგმობი ქმედება".

აღსანიშნავია, რომ ფინეთი 2026 წლის ევროვიზიის გამოკვეთილი ფავორიტია — იგი ლიდერია როგორც ფანების აპლიკაციაში, ასევე ბუქმეიკერების რეიტინგში.

რაც შეეხება ისრაელს, ქვეყანას წლევანდელ ევროფესტივალზე 28 წლის ნოამ ბეტანი წარადგენს, სიმღერით Michelle. აღსანიშნავია, რომ ისრაელის ევროვიზიაზე დარჩენის საკითხს დეკემბერში კენჭი არ ეყარა, როგორც ეს მანამდე იყო დაგეგმილი. ევროვიზიის ორგანიზატორი ევროპის მაუწყებელთა კავშირის (EBU) თქმით, ისრაელის მონაწილეობის საკითხის დღის წესრიგში დაყენება ორგანიზაციის წევრების უმრავლესობამ საჭიროდ არ მიიჩნია. თუმცა, ჟენევაში გამართულ კრებაზე რვა ქვეყნის წარმომადგენლობამ ანონიმური კენჭისყრა მაინც მოითხოვა.

"ამ მოთხოვნას EBU-ის ხელმძღვანელობამ უარით უპასუხა, რაც ზრდის ჩვენს უნდობლობას ორგანიზატორების მიმართ და ადასტურებს, რომ კონკურსი პოლიტიკური ზეწოლის ქვეშაა", — განაცხადა მაშინ ესპანეთის მაუწყებელმა.

• ისრაელის ევროვიზიაზე დაშვების გამო, ოთხი ქვეყანა კონკურსს ტოვებს

2026 წლის ევროვიზიის სიმღერის კონკურსი 12, 14 და 16 მაისს გაიმართება. საქართველოს წლევანდელ ფესტივალზე ჯგუფი ბზიკები წარადგენს. მათ საკონკურსო სიმღერას, სახელწოდებით On Replay, 11 მარტს მოვისმენთ.