ევროკავშირმა ყულევის ნავთობის ტერმინალი რუსეთის წინააღმდეგ სანქციათა მე-20 პაკეტიდან ამოიღო. ამის შესახებ ინფრომაციას პროსამთავრობო პროპაგანდისტული "იმედი" ავრცელებს. მათი განმარტებით, აღნიშნული გადაწყვეტილების შესახებ ევროკავშირის სპეციალურმა წარმომადგენელმა სანქციების საკითხში დევიდ ო'სალივანმა მაკა ბოჭორიშვილს წერილით აცნობა.

წერილში აღნიშნულია, რომ ევროკავშირისპირველადი პოზიცია გადაიხედა მას შემდეგ, რაც ხელისუფლებამ და პორტის ოპერატორმა პოზიტიური ვალდებულებები იკისრეს. როგორც წერილში სპეციალური წარმომადგენელი აღნიშნავს მიესალმება იმ ფაქტს, რომ საქართველო არ დაუშვებს გემებს, რომლებიც ევროკავშირის სანქციების ქვეშ იმყოფებიან.

"თავდაპირველად საქართველოს ყულევის პორტის ჩართვა სანქციების მე-20 პაკეტში იგეგმებოდა რუსული ნავთობის საზღვაო გადაზიდვებისა და პორტში "ჩრდილოვანი ფლოტის" შესვლის გამო. ეს პირველადი პოზიცია გადაიხედა მას შემდეგ, რაც თქვენმა ხელისუფლებამ და პორტის ოპერატორმა პოზიტიური ვალდებულებები იკისრეს.

მივესალმები თქვენს ვალდებულებას, რომ საქართველო არ დაუშვებს გემებს, რომლებიც ევროკავშირის სანქციების ქვეშ იმყოფებიან, შევიდნენ პორტებში, ან მიიღონ მომსახურება. ვალდებულება აგრეთვე აიღო SOCAR-მა იმის თაობაზე, რომ იმოქმედებს ევროკავშირის მკაცრი სანქციების შესაბამისად, ფასის ზედა ზღვრის დაცვითა და რუსულ ნედლ ნავთობზე და მისგან წარმოებულ ნავთობპროდუქტებზე ევროკავშირის მიერ დაწესებული აკრძალვის გათვალისწინებით.

ჩვენ ძალიან ვაფასებთ თქვენს მუდმივ ძალისხმევას ამ მიმართულებით და გთხოვთ მომავალშიც უზრუნველყოთ, რომ საქართველოს ტერიტორია რუსეთში ასეთი მგრძნობიარე პროდუქციის ექსპორტისა და რეექსპორტისთვის არ გამოიყენებოდეს", — აღნიშნულია წერილში.

შეგახსნებთ, ევროკავშირი, რუსეთის წინააღმდეგ ახალი პაკეტის ფარგლებში, მესამე ქვეყნების პორტების სანქცირებას პირველად აპირებს და ვრცელდებოდა ინფორმაცია, რომ მათ შორის ქართული ყულევის პორტიც იქნებოდა.