სებ-ის პრეზიდენტმა, ნათია თურნავამ "ქართუს" პოდკასტში განაცხადა, რომ ოთხმა ქართულმა ბანკმა, მათ შორის "ქართუმ", SWIFT-ის ჩინურ ანალოგ CIPS-ში პირდაპირი წევრობის სურვილი გამოხატა. მისივე თქმით, ამას სათავე დაუდო საქართველოს ეროვნული ბანკის მზარდმა კონტაქტებმა ჩინეთის ცენტრალურ ბანკთან.

"ჩვენ შესაძლებლობა უნდა გამოვიყენოთ და მაქსიმალურად, როგორც ცენტრალურმა ბანკმა, ხელი შევუწყოთ ჩვენ საბანკო სისტემას, რომ უფრო მეტი მჭიდრო კავშირი ჰქონდეს საგადახდო თვალსაზრისით ჩინურ საფინანსო სისტემასთან იმიტომ, რომ — ერთი რომ იზრდება ვაჭრობა, მეორე, რომ იზრდება ტურიზმი, ჩვენ ვხედავთ, რომ პირდაპირი ფრენების რაოდენობაც იზრდება და საგადახდო სისტემა განაპირობებს, რომ მეტი ტურისტი ჩამოვა და ჩვენგანაც წავა და, მოკლედ, ეს არის მხარდასაჭერი. ამისთვის არსებობს ცნობილი საგადახდო სისტემა CIPS, რომელიც ზოგჯერ არასწორად აღიქმება და ჩვენ განვმარტეთ ეს არაერთხელ, როგორც SWIFT-ის ალტერნატივა და არამც და არამც ეს არ არის. იმიტომ რომ დაახლოებით 180 ქვეყნის 5 ათასზე მეტი წამყვანი ბანკია გაწევრიანებული ამ სისტემაში და პარალელურად სარგებლობენ როგორც SWIFT-ით, ასევე CIPS-ით. ანუ ეს ორი ურთიერთ შემვსები მესიჯინგის სისტემაა, რომელიც ემსახურება გადახდებს. SWIFT ეს არის დოლარი და ევრო და CIPS ეს არის იუანი. მზარდია ტრანზაქციები.

თქვენ, "ქართუ ბანკი" ერთ-ერთი მაგალითი ხართ ამის, იუანში, და ეს ტენდენცია გაძლიერდება. იგივე შეიძლება ითქვას ჩვენს სხვა წამყვან ბანკებზე. ამიტომაც არ გაგვიკვირდა ჩვენ, როცა შევთავაზეთ საბანკო სისტემას, ვის გნებავთ, რომ დაგეხმაროთ, ვისარგებლებთ ჩვენი კავშირებით CIPS-ში პირდაპირი წევრობისთვის, თქვენ ხართ ერთ-ერთი იმ წამყვან ქართულ ბანკებში, ოთხი ბანკია ამ წუთში და ეს რაოდენობა გაიზრდება, ვინც ეს სურვილი გამოხატა, ჩვენ რამდენჯერმე ვმასპინძლობდით CIPS-ის პრეზიდენტს საქართველოში, ძალიან კარგი განწყობაა, გვეხმარებიან ამ პროცესში და იმედია მაქვს, რომ მალე მოხდება თქვენი გაწევრიანება, რაც ნიშნავს იმას რომ პირდაპირ შეძლებთ მოემსახუროთ იუანში ტრანზაქციას.

...ამას სათავე დაუდო ჩვენმა მზარდმა კონტაქტებმა ჩინეთის ცენტრალურ ბანკთან, მემორანდუმი გვაერთიანებს და ამ მემორანდუმის ფარგლებში ბევრი საინტერესო განვითარებაა და ერთ-ერთი აი ესაა", — განაცხადა თურნავამ.

ცნობისათვის, 23 თებერვალს სებ-მა ფინანსურ ბაზრებზე მოქმედი ინსტიტუტების წარმომადგენლებისთვის ჩინეთის ობლიგაციების ბაზარზე წვდომის შესახებ შეხვედრა შედგა. შეხვედრაზე ითქვა, რომ ჩინურ ფინანსურ ბაზრებზე ოპერირების შესაძლებლობა კიდევ უფრო გაფართოვდა მას შემდეგ, რაც საქართველოს ეროვნულმა ბანკმა მსოფლიოს ერთ-ერთ უმსხვილეს და უმნიშვნელოვანეს საფინანსო ბაზარზე — ჩინეთის ბანკთაშორის ობლიგაციების ბაზარზე (China Interbank Bond Market — CIBM) მოიპოვა წვდომა.

რაც შეეხება CIPS-ს, ის საზღვრისპირა ბანკთაშორისი გადახდის სისტემა (CIPS) ჩინური გადახდის სისტემაა, რომელიც სთავაზობს კლირინგისა და ანგარიშსწორების მომსახურებას მისი მონაწილეებისთვის საზღვრისპირა იუანის (RMB) გადახდებსა და ვაჭრობაში. CIPS-ს მხარს უჭერს ჩინეთის სახალხო ბანკი და იგი 2015 წელს შეიქმნა, როგორც ჩინეთის ვალუტის გამოყენების ინტერნაციონალიზაციის პოლიტიკის ნაწილი.

CIPS-ის მონაწილეები მსოფლიოს 121 ქვეყანასა და რეგიონში არიან განლაგებულნი. ბიზნესი მოიცავს 4900-ზე მეტ საბანკო დაწესებულებას მსოფლიოს 189 ქვეყანასა და რეგიონში.