პოლიტოლოგი გია ხუხაშვილი სახელმწიფო უსაფრთხოების სამსახურში გამოკითხვაზე მივიდა. მისი თქმით, უწყებაში დაბარება, სავარაუდოდ, ირანთან დაკავშირებულ კომენტარს უკავშირდება, რომელიც მან "პალიტრანიუსის" გადაცემა "360 გრადუსში" გააკეთა.

ხუხაშვილმა ჟურნალისტებთან საუბრისას განაცხადა, რომ ეს ყველაფერი საზოგადოების დაშინებას ემსახურება. მან ასევე განმარტა, რომ ტერაქტების საქართველოში დაწყებაზე არაფერი უთქვამს და აღნიშნული მოსაზრება მხოლოდ რეგიონის კონტექსში გააჟღერა.

"ეს ყველაფერი საზოგადოების დაშინებას ემსახურება, რომ ეს თემა მოკლან. მე ვთქვი, რომ რისკები იმისა, რომ ტერაქტების სერია დაიწყოს, მაღალია. საქართველოში [დაწყებაზე] არ მითქვამს, რეგიონზე ვთქვი.

ისრაელის საელჩოს განცხადებასაც ნახავდით. დიდი ბოდიში, მაგრამ წარმოშობით ებრაელი ვარ, ასე რომ პირად საფრთხესაც ვგრძნობ. [ეს განცხადება] ანალიზის საფუძველზე გავაკეთე. როცა ასეთი ჯგუფები არსებობს ქვეყანაში, რისკები ყოველთვის არის," — განაცხადა ხუხაშვილმა (მის სიტყვას "ტვ პირველი" ავრცელებს).

ხუხაშვილმა შესაძლო დაკავების შესახებ კითხვასაც უპასუხა და აღნიშნა, რომ დაკავების არ ეშინია, მაგრამ მისივე თქმით, არაფრის გამორიცხვა შეიძლება.

"მე ვერ შემაშინებენ იციან და ვიღაცებს ხომ შეეშინდება. ესეც საქმეა. გამორიცხვა არაფრის არ შეიძლება. დაკავების ნამდვილად არ მეშინია. რომ დამაკავონ რა? წამოვწვები და წიგნებს წავიკითხავ. აბსურდია. საქართველოს მოქალაქეები გადიოდნენ მომზადებას. სუს-მა ჩემზე კარგად იცის, მათ კითხეთ. არსებობს ჯგუფები ამერიკიდან სანქცირებული, უნივერსიტეტი რომაა ცნობილი. საქართველოშიც ჰქონდათ აქტივობები. ამაზეა საუბარი, მეტი არაფერი. ეს არ იცის ვინმემ? ყველამ იცის. საჯარო ინფორმაციაა," — თქვა გია ხუხაშვილმა გამოკითხვაზე შესვლამდე "ტვ პირველი".

ცნობისთვის, გია ხუხაშვილმა "პალიტრანიუსის" ეთერში განაცხადა, რომ ვრცელდება ინფორმაცია, საქართველოს მოქალაქეებით დაკომპლექტებული გარკვეული ჯგუფების შესახებ, რომლებიც ირანში გადიოდნენ მომზადებას, რაც რეგიონული დაძაბულობის ფონზე დამატებით რისკებს ქმნის.

"ძალიან საფრთხილო სიტუაციაა. დეტალებს ვერ ვიტყვი. ღია წყაროებიდან ვფლობ ინფორმაციას, მაგრამ ინფორმაცია საკმაოდ დამაჯერებელია და აქედან გამომდინარე, ვფიქრობ, საფრთხე არის რეალური. შეიძლება დაიწყოს ტერაქტების სერია...

რამდენი ხანია საუბარია, რომ "ალ-მუსტაფას უნივერსიტეტში", რომელიც აშშ-ის მიერ არის დასანქცირებული, რადგან ჯაშუშურ საქმიანობაშია ეჭვმიტანილი, ამზადებენ აქტიური მოქმედებებისთვის დაჯგუფებებს. გავიდა ინფორმაცია, რომ თითქოს ამ უნივერსიტეტს საქართველოში სამი ფილიალი აქვს: გარდაბანში, მარნეულში და ფონიჭალაში. გარკვეული ჯგუფები ირანში გადიოდნენ მომზადებას და ისინი საქართველოს მოქალაქეები არიან — რა მომზადებას გადიოდნენ, რა არის მოსალოდნელი? ომი რომ არ იყოს, შეიძლება სხვანაირად შეგვეხედა, მაგრამ ომი დაიწყო. თუ "ნაღმებია ჩადებული", როდის გააქტიურებს ირანის ხელისუფლება, რომელიც გამწარებულია, ჩვენ ხომ არ ვიცით?!", — განაცხადა მან ("რადიო თავისუფლება").

შეგახსენებთ, ჰადსონის უნივერსიტეტმა კვლევა სახელწოდებით — "საქართველოს ირანისკენ შემობრუნება: თეირანის გავლენის სწრაფი გაფართოება ოდესღაც აშშ-ის ერთგულ მოკავშირეზე" გამოქვეყნა. კვლევა საქართველოში ირანის მზარდ გავლენას ეხება და მისი თანაავტორები ჰადსონის ინსტიტუტის უფროსი მეცნიერ-თანამშრომელი ლუკ კოფი და საბჭოთა წარსულის კვლევის ლაბორატორიის პროექტების მენეჯერი, გიორგი კანდელაკი არიან.

აღნიშნულ კვლევას საქართველოში მწვავე რეაქცია მოჰყვა. სუს-მა გამოძიება სისხლის სამართლის კოდექსის 319-ე მუხლით დაიწყო, რაც უცხო ქვეყნისათვის, უცხოეთის ორგანიზაციისათვის ან უცხოეთის კონტროლს დაქვემდებარებული ორგანიზაციისათვის მტრულ საქმიანობაში დახმარებას გულისხმობს.

გამოძიების ფარგლებში უკვე დაიკითხნენ თავად გიორგი კანდელაკი, ყოფილი თავდაცვის მინისტრი თინა ხიდაშელი, ოპოზიციონერი პოლიტიკოსი გუბაზ სანიკიძე და ექსპერტი გია ხუხაშვილი. ამავე საკითხზე დაკითხვაზეა დაბარებული ოპოზიციონერი პოლიტიკოსი გივი თარგამაძე, რომელიც ამჟამად ქვეყანაში არ იმყოფება.