სახალხო დამცველმა, ლევან იოსელიანმა ეუთოს საპარლამენტო ასამბლეის პრეზიდენტ პერე ჟოან პონს სამპიეტროსთან შეხვედრის შემდეგ ჟურნალისტებთან საუბრისას განაცხადა, რომ შეხვედრაზე, სახვა საკითხებთან ერთად, საპატიმროებში მყოფ ადამიანებზე, დაზარალებულ ჟურნალისტებსა, საკონსტიტუციო სარჩელზე და სასამართლოს მიერ ადმინისტრაციული პატიმრობის გამოყენების სტატისტიკის ზრდაზე ისაუბრა.

მისივე თქმით, ძირითადად ადამიანის უფლებების საკითხები აინტერესებდათ და იმ ანგარიშთან დაკავშირებით ისაუბრეს, რომელიც სახალხო დამცველმა პარლამენტში შარშან წარადგინა. მან ასევე განმარტა, რომ საუბარი იყო იმ გამოძიებაზე, რომელიც დაწყებულია საპატიმროში მყოფი ადამიანებთან და 2024 წლის დეკემბერში თბილისის ქუჩებში მიმდინარე მოვლენებთან დაკავშირებით.

"ძალიან მნიშვნელოვანი და საინტერესო შეხვედრა იყო. ძირითადად აინტერესებდათ ინფორმაცია ადამიანის უფლებების შესახებ. იმ ანგარიშის ირგვლივ გვქონდა საუბარი, რომელიც პარლამენტში შარშან წარვადგინე და რომელიც ეხებოდა 2024 წლის დეკემბერში მიმდინარე მოვლენებს თბილისის ქუჩებში, მათ შორის დღეს საპატიმროში მყოფი ადამიანების მდგომარეობას. ასევე, საუბარი იყო იმ გამოძიებაზე, რომელიც დაწყებულია ამ საქმეებზე და სამწუხაროდ, ბოლომდე არ არის მიყვანილი. ამ საკითხებზე ჩემგან დეტალურად მოისმინეს ინფორმაცია", — განაცხადა იოსელიანმა (IPN).

ლევან იოსელიანმა ასევე განაცხადა, რომ ეუთოს წარმომადგენლების პოზიციას თავად ვერ გააჟღერებს და ამაზე ისინი თავად ისაუბრებენ. მისივე თქმით, მან საკონსტიტუციო სარჩელი წარადგინა, სადაც მიღებული კანონმდებლობის ნაწილის ცვლილება მოითხოვა, რომელიც განმეორებით შემთხვევაში სისხლის სამართლის პასუხისმგებლობის დაწესებას, ნიღბების ტარების აკრძალვას და ა.შ ეხება.

"მათ მაგივრად პოზიციის გაჟღერება გამიჭირდება, ალბათ, თვითონ ისაუბრებენ. შემიძლია ვთქვა იმ საქმიანობაზე, რასაც მე, როგორც სახალხო დამცველი ვახორციელებ. ალბათ, იცით, რომ საკონსტიტუციო სარჩელი წარვადგინე სასამართლოში, სადაც მოვითხოვე მიღებული კანონმდებლობის ნაწილის ცვლილება, რადგან მიმაჩნია, რომ არ მოდის შესაბამისობაში საერთაშორისო სტანდარტებთან და საქართველოს კონსტიტუციასთან. საკონსტიტუციო სარჩელი წარდგენილია იმ კანონმდებლობასთან დაკავშირებით, რომელიც გულისხმობს განმეორებით შემთხვევაში სისხლის სამართლის პასუხისმგებლობის დაწესებას, ნიღბების ტარების აკრძალვას და ა.შ. ჩვენი შეხვედრის მნიშვნელოვანი ნაწილი დაეთმო სწორედ აქციების შედეგად დაზარალებული მოქალაქეების, მათ შორის ჟურნალისტების საქმეების განხილვას, ამ საკითხზე სახელმწიფოს რეაგირებას და ჩვენს როლს. ამ ყველაფრის ირგვლივ მათ ინფორმაცია მივაწოდე. რაც შეეხება ბოლო [საკანონმდებლო] ცვლილებებს, დამუშავება მიმდინარეობს. თუ დავინახავთ, რომ ისიც მოდის საერთაშორისო სტანდარტებთან ან ჩვენს კონსტიტუციასთან წინააღმდეგობაში, რა თქმა უნდა, გასაჩივრდება", — განაცხადა ლევან იოსელიანმა.

მისივე თქმით, ეუთო-ს საპარლამენტო ასამბლეის დელეგაციას კითხვები ჰქონდა ადმინისტრაციული პატიმრობის სტატისტიკის ზრდაზე.

"ადმინისტრაციული პატიმრობის გამოყენების შემთხვევები გაზრდილია, ვიდრე წინა წლებში იყო. ამაზეც იყო საუბარი, დაისვა კითხვა, ხშირად იყენებს თუ არა დღეს სასამართლო ადმინისტრაციულ პატიმრობას და კი, ეს ასე არის. ეს შემიძლია დავადასტურო. შემიძლია ვთქვა, რომ 2025 წელს უფრო ხშირად ხდება ადმინისტრაციული პატიმრობის, როგორც ღონისძიების გამოყენება, ვიდრე ეს 2024 წელს ან 2023 წელს ხდებოდა," — თქვა იოსელიანმა.