ოპოზიციონერი პოლიტიკოსი ხატია დეკანოიძე, ევროკავშირის სპეციალური წარმომადგენელის სანქციების საკითხში დევიდ ო'სალივანის განცხადებას ეხმაურება, სადაც ნათქვამია, რომ ევროკავშირმა ყულევის ნავთობის ტერმინალი რუსეთის წინააღმდეგ სანქციათა მე-20 პაკეტიდან ამოიღო.

"ქართულ ოცნებას სერიოზულად შეშინებია ყულევის პორტის სანქცირება და უამრავი ვალდებულება აუღია ევროკავშირისგან, რომ ამის შემდეგ ეს პორტი აღარ იქნება გამოყენებული რუსული ნავთობის გასატარებლად.

როგორ ატყუებენ ქართველ ხალხს: ევროკავშირს ლანძღავენ, მის მნიშვნელობას აკნინებენ და თან ევროკავშირის სანქციების ისე ეშინიათ, რომ ეხვეწებოდნენ — მეტს აღარ გავატარებთ რუსულ ნავთობსო.

პაპუაშვილი ტყუის.

მისი მთავარი პროპაგანდისტის როლი გასაგებია, მაგრამ ჩვეულებრუვი მტყუარაა: სალივანის წერილში ნათლად არის ნათქვამი, რომ "ოცნების" არალეგიტიმურმა ხელისუფლებამ ვალდებულება აიღო, რომ მეტი ჩრდილოვანი ფლოტი რუსული ნავთობით ყულევში აღარ შემოვა.

არალეგიტიმური ხელისუფლება თვითონ ადასტურებს, რომ სანქციებს არღვევდნენ.

თუ ევროკავშირი არაფერია, მაშინ მისი სანქციების ასე რატომ ეშინოდა ივანიშვილს და რატომ ეხვეწებოდნენ ამოეღოთ ყულევი ამ სანქციების პაკეტიდან.

ევროკავშირი ხელს უწვდის საქართველოს და ამის საპასუხოდ, პაპუაშვილი გერმანიის ელჩს ლანძღავს", — წერს დეკანოიძე.