არაბი მაღალჩინოსნების ინფორმაციით, ირანმა შესაძლოა მიზანში ამოიღოს ბაქო-თბილისი-ჯეიჰანის (BTC) ნავთობსადენი, რომელიც ისრაელისთვის ნედლი ნავთობის ერთ-ერთი მთავარი მიმწოდებელია — ინფორმაციას გამოცემა Middle East Eye ავრცელებს.

"ირანის მუქარა "მტრების ნავთობის ხაზებზე" შეტევის შესახებ, პრაქტიკულად მხოლოდ BTC-ის ნავთობსადენს შეიძლება გულისხმობდეს, რადგან ის ისრაელისთვის ნედლი ნავთობის ერთ-ერთი მთავარი მომწოდებელია," — განაცხადა არაბულმა წყარომ.

ისრაელის ნავთობის მომარაგების დაახლოებით 30% სწორედ BTC ნავთობსადენით მიეწოდება.

"ნავთობსადენი აზერბაიჯანიდან გადის საქართველოზე და თურქეთამდე მიდის, საიდანაც ნავთობი ისრაელში იგზავნება. მისი სამიზნედ ამოღება ირანისთვის საკმაოდ მარტივია, რადგან მასთან ყველაზე ახლოს აზერბაიჯანია,“ — განაცხადა წყარომ.

2 მარტს, ირანმა ასევე განაცხადა, რომ აშშ-ისა და ისრაელის შეტევის საპასუხოდ ჰორმუზის სრუტეში გამავალ ნებისმიერ გემს ცეცხლს გაუხსნის.

"სრუტე (ჰორმუზის) დახურულია. თუ ვინმე შეეცდება გავლას, რევოლუციური გვარდიისა და რეგულარული ფლოტის გმირები ამ გემებს ცეცხლს წაუკიდებენ," — თქვა ორშაბათს ებრაჰიმ ჯაბარიმ, IRGC-ის მთავარსარდლის უფროსმა მრჩეველმა.

ჰორმუზის სრუტე კრიტიკულად მნიშვნელოვანი საზღვაო გზაა, რომელიც ყველაზე ვიწრო ადგილას მხოლოდ 21 მილს აღწევს და რომლის გავლითაც მსოფლიოს დღიური ნავთობის მოხმარების დაახლოებით 20% და ბუნებრივი აირი გადის.