მსოფლიო ლიდერები მიხეილ გორბაჩოვის სიკვდილის გამო მწუხარებას გამოთქვამენ.

რატომ არის მნიშვნელოვანი: გორბაჩოვი სსრკ-ს უმაღლესი საბჭოს პრეზიდიუმის ბოლო თავმჯდომარე იყო.

  • მისი მმართველობის დროს მოხდა 1989 წლის 9 აპრილის ტრაგედია. ასევე, გორბაჩოვის მმართველობის პერიოდს უკავშირდება ჩერნობილის ატომური კატასტროფა და საბჭოთა სისტემის რეფორმირება, რომელიც "პერესტროიკას" სახელით არის ცნობილი;
  • გარდა ამისა, მის პერიოდში ითქვა უარი კომუნისტურ იდეოლოგიაზე, როგორც სახელმწიფოს ერთადერთ იდეოლოგიაზე. მისი ლიდერობის დროს დასრულდა ცივი ომი, დაინგრა ბერლინის კედელი და დაიშალა საბჭოთა კავშირი.

ურსულა ფონ დერ ლაიენი გორბაჩოვს სანდო და პატივსაცემ ლიდერს უწოდებს.

  • "მან გადამწყვეტი როლი ითამაშა ცივი ომის დასრულებასა და რკინის ფარდის დაცემაში, რამაც გზა გახსნა თავისუფალი ევროპისთვის. ეს დამსახურება არის ის, რასაც არ დავივიწყებთ", — წერს ევროკომისიის პრეზიდენტი.

ჯო ბაიდენი აცხადებს, რომ გორბაჩოვი იყო იშვიათი ლიდერი, რომელმაც დაინახა, რომ შესაძლებელი იყო განსხვავებული მომავალი და ჰქონდა გამბედაობა, გაერისკა საკუთარი კარიერა ამის მისაღწევად.

  • "მას სჯეროდა გლასნოსტისა და პერესტროიკის — გახსნილობისა და რესტრუქტურიზაციის — არა როგორც უბრალო ლოზუნგების, არამედ როგორც გზის საბჭოთა კავშირის ხალხისთვის ამდენი წლის იზოლაციისა და დეპრივაციის შემდეგ".

ბორის ჯონსონი წერს, რომ ყოველთვის აღფრთოვანებული იყო გორბაჩოვის სიმამაცითა და პატიოსნებით, რომელიც მან ცივი ომის მშვიდობიანად დასრულებისთვის გამოიჩინა.

  • "უკრაინაში პუტინის აგრესიის დროს, საბჭოთა საზოგადოების გახსნილობისადმი მისი დაუღალავი ერთგულება რჩება მაგალითი ჩვენთვის".

ემანუელ მაკრონი ამბობს, რომ გორბაჩოვის გადაწყვეტილებებმა რუსეთს თავისუფლებისკენ გზა გაუხსნა.

  • "ევროპაში მშვიდობისადმი მისმა ერთგულებამ შეცვალა ჩვენი საერთო ისტორია".