კანადური ტკბილეულის კომპანია Candy Funhouse ახალ თანამშრომელს ეძებს, რომელსაც სხვადასხვა სახის საკონდიტრო ნაწარმის დაგემოვნება ევალება. დასაქმებულს წელიწადში 78 ათას დოლარს გადაუხდიან და როგორც კომპანია აცხადებს, ამ ვაკანსიით უკვე რამდენიმე ათასი კანდიდატი დაინტერესდა.

კომპანიის აღმასრულებელი დირექტორის თქმით, ვაკანსიით დაინტერესებულმა კანდიდატებმა სახალისო ვიდეოებიც გაუგზავნეს და სთავაზობდნენ, რომ ტკბილეულის დაგემოვნებაში ოჯახებსაც ჩართავდნენ. რაც შეეხება დამგემოვნებლის მოვალეობებს, მან ტკბილეულის საბჭოს შეხვედრები უნდა გამართოს, უნდა დააგემოვნოს როგორც ახალი პროდუქცია, ასევე ძველიც ხშირად ამოწმოს და ამ საკითხების შესახებ სხვებთან ერთად იმსჯელოს.

"გაიხსენეთ ყველა მოგონება, რომელიც ტკბილეულ უკავშირდება და წარმოიდგინეთ, რომ ეს ახლა თქვენი საქმეა", — ასე აღწერს სამუშაოს კომპანიის აღმასრულებელი დირექტორი. დაინტერესებულთა სიმრავლის მიუხედავად, ჯერჯერობით კომპანიას სასურველი კანდიდატი არ შეურჩევია.

ამ ეტაპზე Candy Funhouse ჰელოუინისთვის ემზადება და ახალი დამგემოვნებელი ამ სამზადისშიც აუცილებლად უნდა იყოს ჩართული. კომპანიის დირექტორის თქმით, ახალ თანამშრომელს დღეში დაახლოებით 117 სხვადასხვა სახეობის ტკბილეულის დაგემოვნება მოუწევს, რაც საკმაოდ დიდი რაოდენობაა.