როგორც DW წერს, საზღვართან მდგომარეობა 31 ივლისს დაიძაბა.

რატომ არის მნიშვნელოვანი: Reuter-ის ცნობით, ჩრდილოეთ კოსოვოში მცხოვრებმა ეთნიკურმა სერბებმა ჩახერგეს გზები სერბეთთან ორი ძირითადი სასაზღვრო გადასასვლელის მახლობლად.

• ამის შემდეგ კოსოვოს პოლიციამ გამოაცხადა, რომ მათ დაკეტეს სასაზღვრო გადასასვლელები 2 მიმართულებით მომიტინგეების ბლოკადის გამო.
• მედიაში გავრცელდა ინფორმაცია, რომ მთელი დღის განმავლობაში საზღვართან დაძაბულობა იყო. როგორც ევრონიუსი წერს, სერბეთსა და კოსოვოს შორის ადმინისტრაციულ გამყოფ ხაზზე სროლისა და განგაშის სიგნალის ხმა ისმოდა.

ბლოკადას წინ უძღოდა კოსოვოს მთავრობის ორი გადაწყვეტილება სერბული დოკუმენტებისა და სანომრე ნიშნების შესახებ, რომელიც პირველი აგვისტოდან შედის ძალაში. ამის შესახებ ინფორმაცია რადიო თავისუფლების ევროპის ბიურომ გაავრცელა.

• კოსოვოს მთავრობამ განაცხადა, რომ სერბეთიდან შესულ მგზავრებს სერბეთის მიერ გაცემულ დოკუმენტებს შეუცვლიან ახალი, შესვლა-გასვლის აღმრიცხველი საიდენტიფიკაციო დოკუმენტით.
• ამასთან, ჩრდილოეთ კოსოვოში ეთნიკური სერბები იყენებდნენ მანქანების სანომრე ნიშნებს, რომლებიც 1999 ომის შემდეგ სერბეთის მიერ იყო გაცემული.
• კოსოვომ მოითხოვა, რომ ეს სანომრე ნიშნები შეიცვალოს კოსოვოს მიერ გაცემული ნომრებით.

დეტალები: მომიტინგეებმა ხრეშით და სხვა მძიმე ტექნიკით სავსე სატვირთო მანქანები გააჩერეს ორი სასაზღვრო პუნქტის, იარინიესა და ბერნიაკისკენ მიმავალ გზებზე.

• კოსოვოს პოლიციამ განაცხადა, რომ იყო სროლა "პოლიციის ქვედანაყოფების მიმართულებით, მაგრამ საბედნიეროდ არავინ დაშავებულა".
• Reuters კოსოვოს პოლიციაზე დაყრდნობით წერს იმასაც, რომ მომიტინგეებმა სცემეს რამდენიმე ალბანელი, რომლებიც გადაკეტილ გზებზე გადიოდნენ და რამდენიმე მანქანას თავს დაესხნენ.

გარდა ამისა, სერბეთის პრეზიდენტმა, ალექსანდრე ვუჩიჩმა კოსოვოს ადმინისტრაციას მშვიდობის უზრუნველყოფისკენ მოუწოდა. კოსოვოს პრემიერმინისტრი ალბინ კურტი სასაზღვრო დაძაბულობაში სერბეთის პრეზიდენტს ადანაშაულებს.

• სერბეთის პრეზიდენტი ამტკიცებს, თითქოს კოსოვოს ჯარი ჩრდილოეთ სერბეთზე თავდასხმას აპირებს.
• "ჩვენ ვლოცულობთ და ვითხოვთ მშვიდობას. თუ ისინი გაბედავენ სერბების დევნას და მოკვლას, სერბეთი გაიმარჯვებს", — დაწერა მან ტვიტერზე.

არქივიდან: კოსოვო, რომელიც ძირითადად ალბანელებითაა დასახლებული, სერბეთს 1999 წელს გამოეყო, დამოუკიდებლობა კი 2008 წელს გამოაცხადა.

• სერბეთი არ აღიარებს კოსოვოს დამოუკიდებლობას. არც სერბეთის მოკავშირეები, მაგალითად რუსეთი და ჩინეთი.
• მას 100-ზე მეტი ქვეყანა აღიარებს, მათ შორის აშშ, დიდი ბრიტანეთი, საფრანგეთი, გერმანია, თურქეთი და სხვა.