უცხოური ტურიზმიდან მიღებული შემოსავლების შესახებ ინფორმაციას ეროვნული ბანკი ავრცელებს. სებ-ის ცნობით, ივნისში, გასული წლის იმავე თვესთან შედარებით, საქართველოს უცხოურმა ტურიზმმა 179 მილიონით მეტი შემოსავალი მოუტანა.

რატომ არის მნიშვნელოვანი: უცხო ქვეყნის მოქალაქეების მიერ საქართველოში დახარჯული თანხები ადგილობრივ ეკონომიკას მნიშვნელოვნად ეხმარება.

  • საქართველოში შემოსული უცხოური ვალუტა ლარის გაცვლითი კურსის სტაბილურობაზეც ახდენს გავლენას.

დეტალები: მიმდინარე წლის ივნისში საქართველოში ყველაზე მეტი თანხა რუსეთის, ბელარუსისა და თურქეთის მოქალაქეებმა დახარჯეს. ჩამონათვალი ასეთია:

  • რუსეთი — $68,3 მილიონი;
  • ბელარუსი — $28,1 მილიონი;
  • თურქეთი — $28 მილიონი;
  • უკრაინა — $25,9 მილიონი;
  • ისრაელი — $25,6 მილიონი.

გარდა ამისა, ივნისში ყველაზე მეტი ტურისტული ხარჯი საუდის არაბეთის ($13,4 მლნ), სომხეთის ($12,7 მლნ), აზერბაიჯანისა ($8,7 მლნ) და ირანის ($8,5 მლნ) მოქალაქეებმა გასწიეს. ევროკავშირის ქვეყნებიდან კი $30,6 მილიონი შემოვიდა.

ფართო სურათში: როფორც წესი, ტურისტული ხარები ვიზიტების რაოდენობაზეა დამოკიდებული. ტურიზმის ადმინისტრაციის ინფორმაციით, 2022 წლის ივნისში უცხო ქვეყნის რეზიდენტებმა საქართველოში 387 781 ვიზიტი განახორციელეს.

  • ივნისში ყველაზე მეტი ვიზიტორი მეზობელი ქვეყნებიდან შემოვივიდა — რუსეთი (90 239 ვიზიტი), თურქეთი (62 192 ვიზიტი) და სომხეთი (61 974 ვიზიტი).
  • სრული სია შეგიძლიათ იხილოთ აქ.