ინფორმაცია ადვოკატმა, ლევან მახარეიშვილმა ფეისბუქზე გაავრცელა, On.ge-ის კი სასამართლოში დაუდასტურეს.

რატომ არის მნიშვნელოვანი: ერმაკოვი 2014-2017 წლებში მმართველი გუნდის წარმომადგენელი მერი იყო.

  • მას 7-წლიანი პატიმრობა ჰქონდა მისჯილი და პროკურატურა განზრახ თანხების გაფლანგვას ედავებოდა.

დეტალები: ადვოკატი წერს, რომ ერმაკოვი ქუთაისის სააპელაციო სასამართლოს სხდომათა დარბაზიდან გათავისუფლდა.

  • ბათუმელებთან საუბრისას, ის განმარტავს, რომ რომ ყოფილი მერი გამართლდა საბიუჯეტო სახსრების გაფლანგვის ნაწილში და დამნაშავედ მიიჩნიეს უფლებამოსილების ბოროტად გამოყენების კუთხით.
  • მისივე თქმით, ამისთვის ერმაკოვს 3 წელი ჰქონდა მისჯილი და ეს ვადა უკვე გავიდა.
  • TV 25-თან სატელეფონო ინტერვიუში ერმაკოვი ამბობს, რომ სასამართლომ მისი საჩივარი ნაწილობრივ დააკმაყოფილა და კვალიფიციკაცია შეცვალა.
  • მისივე თქმით, აპირებს, სამართლებრივი დავა ბოლომდე გააგრძელოს.

არქივიდან: ბათუმის ყოფილი მერი, ვიცე-მერი, მინისტრის მოადგილეები და სხვა მაღალჩინოსნები ფულის გაფლანგვის ბრალდებით 2019 წლის 30 მაისს დააკავეს, 2 ივნისს კი აღკვეთის ღონისძიების სახით პატიმრობა შეუფარდეს. 2020 წელს სასამართლომ ერმაკოვი დამნაშავედ ცნო.

  • მას და სხვა დაკავებულებს უწყება სამსახურეობრივი მდგომარეობის გამოყენებით დიდი ოდენობით სახელმწიფოს კუთვნილი თანხის მართლსაწინააღმდეგოდ გაფლანგვასა და უფლებამოსილების ბოროტად გამოყენებას ედავებოდა.
  • საუბარი იყო 1 370 076 ლარზე.

პროკურატურა ამბობდა, რომ დაკავებულები იყვნენ ბათუმის მუნიციპალიტეტის მერიის მუდმივმოქმედი სატენდერო კომისიის წევრები.

  • გამოძიების მტკიცებით, მათ ე.წ. იაფი სახლის მშენებლობაზე ტენდერში მონაწილეობა შესთავაზეს იმ ერთადერთ კომპანიას, რომლის შედგენილი დოკუმენტითაც გამოცხადდა შესაბამისი მომსახურების შესყიდვა.
  • მათივე ინფორმაციით, ტენდერში მონაწილე ერთადერთმა კომპანიამ კონვენტ ჯორჯიამ ყალბი დოკუმენტაცია წარადგინა, სატენდერო კომისიამ კი არ იმსჯელა.
  • უწყება განმარტავდა, რომ ამავე დოკუმენტაციის გამო კომისიის იმავე შემადგენლობამ აღნიშნულ კომპანიას სხვა ტენდერში დისკვალიფიკაცია მიანიჭა.
  • პროკურატურა ამბობდა იმასაც, რომ კომპანიას უსაფუძვლოდ ჩაურიცხეს 1 626 396 ლარი, საიდანაც მხოლოდ 251 109 ლარის სამუშაოები შესრულდა.