"მისაღებია თუ არა საქართველოს მთავრობის გაცხადებული მიზანი, გახდეს ნატოს წევრი?" NDI-ის მიერ დასმულ ამ შეკითხვას გამოკითხულთა 68%-მა დადებითად უპასუხა.

გამოკითხულთა 21 პროცენტი ჩრდილოატლანტიკურ ალიანსში გაწევრიანების მომხრე არაა.

ნატოში გაწევრიანება პროცენტულად ყველაზე მეტად მიუღებელია უმცირესობათა დასახლებებში. მათგან 42% ემხრობა ნატოში გაწევრიანებას, ხოლო 25% ეწინააღმდეგება.

მოქალაქეები ნატოში გაწევრიანების სარგებელს უსაფრთხოებაში, ეკონომიკის გაუმჯობესებაში, სამხედრო სისტემის გაძლიერებაში, რუსეთისგან თავდაცვაში, დემოკრატიის განვითარებაში, ნატოს წევრ ქვეყნებში უვიზო მიმოსვლასა და ტერიტორიული მთლიანობის აღდგენაში ხედავენ.

53 პროცენტი იმ 21%-დან, რომელიც აცხადებს, რომ ნატოში გაწევრიანება მიუღებელია, ამის მთავარ მიზეზად რუსეთთან კონფლიქტს ასახელებს.

გამოკითხულთა 20% მიიჩნევს, რომ საქართველო ნატოს წევრი 10 წლის შემდეგ გახდება, ხოლო 16% კი აცხადებს, რომ - არასდროს.

გამოკითხულთა 45% მიიჩნევს, რომ ნატოს მხრიდან საქართველოსადმი მხარდაჭერა იგივე დარჩა, 18% მიიჩნევს, რომ შემცირდა, ხოლო 17% - გაიზარდა.

კვლევის საველე სამუშაოები NDI-ის დაკვეთით, CRRC-იმ 2017 წლის 7-28 აპრილის პერიოდში ჩაატარა. გამოკითხული 2 493 მოქალაქე წარმომადგენლობითი შერჩევის წესით, მთელი ქვეყნის მასშტაბით (ოკუპირებული ტერიტორიების გარდა) შეირჩნენ და პირისპირ ინტერვიუს სახით გამოკითხეს. კვლევის ცდომილების ზღვარია 2,7 პროცენტი. კვლევა დიდი ბრიტანეთის მთავრობის UK aid-ის ფინანსური მხარდაჭერით ჩატარდა.