საქართველოს შინაგან საქმეთა სამინისტროს თანამშრომლებმა ხუთი პირი ცეცხლსასროლი იარაღის მართლსაწინააღმდეგო შეძენა-შენახვისა და ტარების ბრალდებით, ფოთში დააკავეს. ამის შესახებ ინფორმაციას შსს-ს პრესსამსახური ავრცელებს.

მათვე ინფორმაციით, სამართალდამცველებმა ბრალდებულების პირადი ჩხრეკის შედეგად ამოიღეს:

  1. თვითნაკეთი ცეცხლსასროლი პისტოლეტი მჭიდითა და ხუთი საბრძოლო ვაზნით;
  2. GOLD STAR-2002-ის მოდელის ცეცხლსასროლი პისტოლეტი მჭიდითა და ერთი საბრძოლო ვაზნით;
  3. თვითნაკეთი ერთლულიანი, გლუვი ლულის მქონე ცეცხლსასროლი იარაღი ერთი საბრძოლო ვაზნით;
  4. მაკაროვის სისტემის პისტოლეტი მჭიდითა და ორი საბრძოლო ვაზნით;
  5. COMBAT-PP-ის მოდელის ცეცხლსასროლი პისტოლეტი მჭიდითა და ერთი საბრძოლო ვაზნით.

უწყების ინფორმაციით, ხუთივე დაკავებული დანაშაულს აღიარებს.

მათ ბრალი საქართველოს სისხლის სამართლის კოდექსის 236-ე მუხლის მე-2 და მე-3 ნაწილებით წაეყენათ. ამ მუხლის მეორე პუნქტით, ცეცხლსასროლი იარაღის, საბრძოლო მასალის, ფეთქებადი ნივთიერების ან ასაფეთქებელი მოწყობილობის მართლსაწინააღმდეგო შეძენა ან შენახვა, აგრეთვე სანადირო ცეცხლსასროლი იარაღის ან სპორტული ცეცხლსასროლი იარაღის მართლსაწინააღმდეგო შეძენა ან შენახვა არაერთგზის ისჯება თავისუფლების აღკვეთით ვადით ოთხ წლამდე. ამავე მუხლის მესამე პუნქტით კი, ცეცხლსასროლი იარაღის, საბრძოლო მასალის, ფეთქებადი ნივთიერების ან ასაფეთქებელი მოწყობილობის მართლსაწინააღმდეგო ტარება ისჯება თავისუფლების აღკვეთით ვადით ოთხიდან ექვს წლამდე.

საქმეზე გამოძიება გრძელდება.