სამართლიანი არჩევნები (ISFED) იმედის დაკვეთით ჩატარებულ, ანტიდასავლური ნარატივების შემცველ კვლევას კრიტიკულად აფასებს და აღნიშნავს, რომ კითხვების ნაწილის ფორმულირება არ შეესაბამება ვალიდობის სტანდარტებს და აცდენილია აქტუალობას.

რატომ არის მნიშვნელოვანი: მაშინ, როცა ქვეყანაში პროკრემლისტური ჯგუფები ანტიდასავლური რიტორიკას გამუდმებით აჟღერებენ, მსგავსი კვლევა საფრთხისშემცველ პრეცედენტს ქმნის.

  • ორგანიზაციის შეფასებით, ეს მიზნად ისახავას არა საზოგადოებრივი აზრის შესწავლას, არამედ მის მანიპულირებას და ამდენად, პროპაგანდის ინსტრუმენტს წარმოადგენს.

ISFED მიუთითებს, რომ კვლევა ავტორიტარული რეჟიმებისთვის დამახასიათებელი პროპაგანდის მეთოდების ისეთ ტექნიკებს აერთიანებს, როგორიცაა:

  • შიშის დანერგვა, ადამიანების არარსებული არჩევნის წინაშე დაყენება, მტრის ხატის შექმნა, საზოგადოებრივი აზრისა და განწყობების მანიპულაცია, მოტყუება.
  • მათი თქმით, კვლევის ეს ნაწილი, თავისი აბსურდულობით, აქამდე შეფარვით მიმდინარე ანტიდასავლური რიტორიკის საზოგადოებრივ აზრზე მოხვევის მცდელობას წარმოადგენს.

GORBI-ის კვლევის კითხვები იმეორებს მმართველი გუნდის მიერ არაერთხელ გაჟღერებულ განცხადებებს, მათ შორის, ისეთ საკითხებზე, როგორიცაა, საქართველოს ომში "ჩათრევის" მცდელობა და მეორე ფრონტის გახსნა. კვლევაში კითხვები შემდეგნაირად ფორმულირდება:

  • "თუ დასავლეთი მოსთხოვს საქართველოს რუსეთის წინააღმდეგ ომში ჩაბმას, როგორი უნდა იყოს საქართველოს პოზიცია?"
  • "მთავრობა არ შეუერთდა რუსეთის წინააღმდეგ მიმართულ ეკონომიკურ სანქციებს, რადგან მისი განცხადებით, ეს სანქციები ვერ დააზარალებდა რუსეთს, თუმცა სერიოზულ ზიანს მიაყენებდა ქართულ ეკონომიკას და მოსახლეობას. ეთანხმებით თუ არა ამ ნაბიჯს".
  • "ყველაზე მეტად ვინ არის დაინტერესებული საქართველოში გაიხსნას მე-2 ფრონტი რუსეთთან?"

ანტიდასავლური რიტორიკა: ISFED-ის შეფასებით, დაშვება, თითქოს დასავლეთს საქართველოში ომი შეიძლება უნდოდეს, თანხვედრაშია პრორუსული ჯგუფების მცდელობასთან დასავლეთს უკრაინაში რუსეთის ომის წამოწყება გადააბრალონ, შემდეგ ამას საქართველოს ომში ჩათრევის აბსურდული თეორია მიუსადაგონ.

  • "ამ საფრთხეების ფონზე, იმის ნაცვლად, რომ სახელმწიფო სრული ძალისხმევით რუსულ პროპაგანდას დაუპირისპირდეს, პროსახელისუფლებო მედია, მანიპულაციური ხერხებით, აბსურდული შიშების ირგვლივ საზოგადოებრივი აზრის გამოკვეთით ხელ-ფეხს უხსნის რუსეთს მისი ბრალეულობის პრევენციისთვის".

კვლევა გამოქვეყნდა მას შემდეგ, რაც ევროპარლამენტმა საქართველოს შესახებ კრიტიკული რეზოლუცია მიიღო, რასაც მმართველი გუნდის მხრიდან ევროპარლამენტარების ტყუილში დადანაშაულება მოჰყვა.

  • ISFED აღნიშნავს, რომ კვლევა წარმოადგენს მცდელობას, მსგავსი დამოკიდებულება, საზოგადოების მხრიდან ლეგიტიმურად წარმოაჩინონ.
  • ორგანიზაცია მიუთითებს იმასაც, რომ კვლევას აქტიურად იხმობენ სახელისუფლებო ექსპერტები და Facebook-ზე მმართველ პარტიის სასარგებლოდ მოქმედი ცრუ მედიის გვერდებიც ავრცელებენ.