პრემიერმინისტრ ირაკლი ღარიბაშვილს ბრატისლავაში, გლობალური უსაფრთხოების ფორუმზე 5 ივლისის მოვლენებსა და ოპერატორ ლექსო ლაშქარავას შესახებ დაუსვეს კითხვა. დარბაზიდან მას ჰკითხეს, დაუშვებს თუ არა საქართველოს მთავრობა იმავე შეცდომას, რაც მან გასულ წელს დაუშვა.

"თქვენ იკითხეთ, რატომ არ უნდა მიიღოს საქართველომ ევროკავშირის კანდიდატის სტატუსი. ჩემი კითხვაა და დავუბრუნდები გასული წლის 11 ივლისს, როდესაც ჟურნალისტი და ოპერატორი თბილისის ცენტრში თბილისი პრაიდის დროს მოკლეს, როდესაც ულტრამემარჯვენეები დაესხნენ თავს, თქვენმა ხელისუფლებამ არაფერი გააკეთა აქტივისტების დასაცავად. ამ წელს გაიმეორებს თქვენი მთავრობა იმავე შეცდომას, თუ დაიცავს ევროპულ ღირებულებებს", — ჰკითხეს მას.

ღარიბაშვილმა კითხვაზე პასუხი ანტიდისკრიმინაციული კანონის მიღებაზე საუბრით დაიწყო. შემდეგ კი აღნიშნა, რომ ამ საკითხთან დაკავშირებით პრობლემა ყველა ქვეყანაში, მათ შორის, ევროკავშირის წევრ ქვეყნებშიცაა.

"ყველას უნდა შეგახსენოთ, რომ 2014 წელს ანტიდისკრიმინაციული კანონი მივიღეთ ყველა სახის დისკრიმინაციის აღმოსაფხვრელად. გულწრფელად რომ გითხრათ, ეს არ არის პრობლემა. რა თქმა უნდა, ბევრ ქვეყანაში, მათ შორის ევროკავშირის წევრ ქვეყნებში, არის პრობლემები, გამოწვევები ამ საკითხთან დაკავშირებით. მაგრამ ეს ინფორმაცია [ლექსო ლაშქარავაზე] არ არის სწორი.

ბატონმა თქვა, რომ ოპერატორი დაპირისპირების დროს მოკლეს. არ ვისაუბრებ დეტალებზე, მაგრამ ძალიან მოკლედ გეტყვით — პოლიციამ 30-ზე მეტი ადამიანი დააკავა, რომლებიც თავს დაესხნენ ჟურნალისტებსა და ოპერატორებს, ისინი ციხეში არიან. ეს არის სახელმწიფოს ვალდებულება, რომ დაიცვას თითოეული მოქალაქე, მიუხედავად მათი ორიენტაციისა და მსგავსი რაღაცებისა. შეგახსენებთ, რომ საქართველოში არსებული კანონი იცავს ყველა მოქალაქეს", — აღნიშნა ღარიბაშვილმა.

2021 წელს ჰომოფობიური, ძალადობრივი ჯგუფები და საპატრიარქო მაშინვე დაუპირისპირდნენ თბილისი პრაიდს, როგორც კი ღონისძიებები დაანონსდა და განაცხადეს, რომ ჩატარებას არ დაუშვებდნენ. გარდა ამისა, 5-6 ივლისის ძალადობას წინ უძღოდა ქართული ოცნების ლიდერების განცხადებები იმაზე, რომ ღირსების მარშს მიზანშეწონილად არ მიიჩნევენ.

5 ივლისს, როცა ადამიანები საკუთარი ფუნდამენტური უფლებების დასაცავად რუსთაველის გამზირზე უნდა გამოსულიყვნენ, ჰომოფობიურმა ჯგუფებმა ტერიტორია დაიკავეს და ჟურნალისტებს ფიზიკურად გაუსწორდნენ. თავდასხმის შედეგად დაშავდა 50-ზე მეტი ჟურნალისტი, მათ დაარბიეს თბილის პრაიდის ოფისი, სცადეს სირცხვილიას ოფისში შეჭრა და თავს დაესხნენ ადამიანის უფლებათა ცენტრს, სადაც, სავარაუდოდ, ხელნაკეთი ასაფეთქებელი მოწყობილობა შეაგდეს, რის შედეგადაც ერთი ადამიანი დაშავდა. 11 ივლისს აქციაზე ნაცემი ოპერატორი, ლექსო ლაშქარავა გარდაიცვალა.

5 ივლისს დღის განმავლობაში პოლიციას არავინ დაუკავებია. ძალადობრივ კონტრაქციაზე მობილიზებული იყო არასაკმარისი სამართალდამცავი და პოლიციელებს ტერიტორიიდან გაჰყავდათ არა მოძალადეები, არამედ ჟურნალისტები. დაგეგმილი ღირსების მარში ვერ შედგა, თუმცა, მეორე დღეს, ჟურნალისტებზე ძალადობის დასაგმობად მოქალაქეები მდუმარე აქციაზე შეიკრიბნენ. მათ შეუერთდნენ პრაიდის ორგანიზატორებიც, რომლებმაც ლგბტ დროშა გაშალეს და ფერადი კვამლი გაუშვეს. პრაიდი ჯებირებს მიღმა მობილიზებული ძალადობრივი ჯგუფების გინებისა და მუქარების ფონზე მაინც შედგა. აქციის დასრულების შემდეგ პრაიდის წევრებმა და ჟურნალისტებმა ტერიტორია პოლიციის დახმარებით დატოვეს.

5 ივლისის ჰომოფობიური და ძალადობრივი აქციის ორგანიზატორები ამ დრომდე არ არიან დასჯილები.