კიევის ჩრდილოეთით მდებარე პატარა სოფელი ოკუპანტების თავდასხმისგან გამიზნულმა დატბორვამ გადაარჩინა. უკრაინულმა ძალებმა სოფელ დემიდივის მახლობლად მდინარე ირპინზე დამბა ომის პირველ ხანებშივე მოშალეს, რის გამოც დასახლების ტერიტორია წყლით დაიფარა. ადგილი დაჭაობდა, სარდაფები და ველები კი დაიტბორა, თუმცა, სოფლის მცხოვრებლების თქმით, რუსული ძალების შემოჭრისგან დასაცავად გადადგმული ეს ნაბიჯი ღირდა.

"რა თქმა უნდა, ეს კარგი იყო", — ამბობს დემიდიველი ვოლოდიმირ არტემჩუკი, — "რა მოხდებოდა, რუსულ ძალებს რომ პატარა მდინარე გადაელახათ და კიევში შესულიყვნენ?"

ადგილობრივი ოლეკსანდრ რიბალკოს თქმით, სოფლის მიწების მესამედი დაიტბორა. ამ ამბიდან ორი თვეზე მეტი ხნის შემდეგ კი, დასახლებაში მცხოვრები ხალხი ტერიტორიაზე ისევ ნავებით გადაადგილდება და მშრალად დარჩენილ მიწაზე ყვავილებსა და ბოსტნეულს რგავს.

ფოტო: REUTERS / Carlos Barria

რუსეთის უკრაინაში შეჭრიდან და სრულმასშტაბიანი ომის დაწყებიდან თითქმის სამი თვე გავიდა. გავრცელებული ცნობებით, სამხედრო კონფლიქტმა ათასობით მშვიდობიანი მოქალაქის სიცოცხლე შეიწირა, მილიონობით უკრაინელი კი ლტოლვილად აქცია.

კრემლი ომს, რომელმაც უამრავი ბავშვიც იმსხვერპლა, "სპეციალურ სამხედრო ოპერაციას" უწოდებს და მის მიზნად უკრაინის "განიარაღებას და ფაშისტებისგან დაცვას" ასახელებს.

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში