საქართველოს საპარლამენტო დელეგაცია უკრაინიდან დღეს, 17 მარტს დაბრუნდა. პარლამენტის ვიცე-სპიკერმა, დავით სერგეენკომ პირველ არხთან საუბრისას განაცხადა, რომ უკრაინაში ვიზიტი იყო უმნიშვნელოვანესი არა მარტო ხანმოკლე პერსპექტივაში, არამედ სამომავლოდ ქვეყნების ურთიერთობის ჭრილშიც.

"ვიზიტის დაგეგმვის დროს ჩვენ გვქონდა, რა თქმა უნდა, მოლოდინები ორი მიმართულებით. პირველი, ეს იყო საქართველოს სოლიდარობის გამოხატვა ქვეყნის, ქვეყნისადმი. მეორე, ეს მოგვცემდა საშუალებას, არსებული გაუგებრობები მოგვარებულიყო. ამ შეხვედრის განმავლობაში, რომელიც საკმაოდ დიდხანს გაგრძელდა რადაში, უკვე ცხადად ჩანდა ნიშნები, რომ ამ შეხვედრამ ბევრი რამ შეცვალა, შეცვალა დადებითისკენ. მათი განწყობა შეხვედრის დაწყებიდან დასასრულამდე მნიშვნელოვნად იყო პოზიტიურად შეცვლილი. [...]

გაუგებრობების უდიდესი ნაწილი იქვე გაირკვა და იქვე ამოიწურა. თუ დარჩა რაიმე მიმართულება, მაგალითად სანქციების მხარდაჭერა-არმხარდაჭერის მხრივ, შალვა პაპუაშვილმა ძალიან მკაფიო და ცხადი განმარტებები გააკეთა, რაც მათთვის აბსოლუტურად გასაგები და მისაღები აღმოჩნდა. ვფიქრობ, შეგვიძლია ვთქვათ, რომ ამ საკითხების აბსოლუტური უმრავლესობა უკვე დახურულია და თუკი დარჩა რამე საკითხი, უკვე პოზიტიური მოგვარების გზაზეა", — ამბობს სერგეენკო.

როგორც ლელო წევრი ანა ნაცვლიშვილი ამბობს, რუსლან სტეფანჩუკმა ქართულ მხარეს ორი რამ სთხოვა. პირველი — საქართველომ იმსჯელოს ორმხრივ სანქციებზე, სადაც ამის შესაძლებლობას დაინახავს და მეორე — საქართველომ გადადგას ნაბიჯები, რომელიც უკრაინამ უკვე გადადგა და ეს ეხება რუსულ პროპაგანდასთან და დეზინფორმაციასთან ბრძოლას.

"ხაზი გაესვა იმას, რომ საერთაშორისო სანქციებისთვის გვერდის ავლისთვის შავი ხვრელი საქართველო არ გახდება", — ამბობს ნაცვლიშვილი.

გირჩის ერთ-ერთი ლიდერის, ვახტანგ მეგრელიშვილის განცხადებით, რადას დეპუტატებს აქვთ განცდა, რომ საქართველო მათთვის საკმარისად არ არის უკრაინის გვერდით.

"ველაპარაკეთ დეპუტატებს და იმ დეპუტატების განცდა არის, რომ საქართველოს მეტი აქვს გასაკეთებელი. მართალი გითხრათ, ზუსტად ინფორმაცია არც კი იცოდნენ, რა სანქციებზე ვართ შეერთებული და რაზე არ ვართ. მაგრამ დარწმუნებული ვარ, რომ ემოციურად აქვთ ეს ინფორმაცია, რომ საქართველო მათთვის საკმარისად არ არის უკრაინის გვერდით. [...]

რასაც თქვენ ხედავთ ამ კადრებს, ეს ფიზიკურად ვნახეთ და რა თქმა უნდა, უფრო მძიმე და ემოციურია, როდესაც ადამიანები გიყვებიან შენი ნანახის რეალურ ისტორიებს. აი როგორ მოხდა ეს ყველაფერი", — აცხადებს მეგრელიშვილი.

დეპუტატ ხათუნა სამნიძის თქმით, აღნიშნული ვიზიტი დაგვიანებული იყო, თუმცა მნიშვნელოვანი ორი მეგობარი ქვეყნის ურთიერთობის აღდგენისთვის

"ამ შეხვედრის შემდეგ მე იმედს ვიტოვებ, რომ დისკუსია მაინც გაიხსნება მათ შორის ოპოზიციასთან, რა შეიძლება გაკეთდეს იმისთვის რომ ჩვენ კიდევ ერთხელ კიდევ ერთი ნაბიჯით მხარი დავუჭიროთ ჩვენს პარტნიორ ქვეყანას უკრაინას", — თქვა სამნიძემ.

საქართველოს პარლამენტის 9 დეპუტატისგან შემდგარი დელეგაცია უკრაინაში 16 აპრილს ჩავიდა.დელეგაციის შემადგენლობაში შედიოდნენ: შალვა პაპუაშვილი, არჩილ თალაკვაძე, დავით სერგეენკო, ლევან იოსელიანი, ბექა ოდიშარია, ანა ნაცვლიშვილი, ვახტანგ მეგრელიშვილი, ხათუნა სამნიძე და გიორგი ხოჯევანიშვილი. ისინი იმყოფებოდნენ უკრაინის ქალაქებში, ბუჩასა და ირპენში.