პრემიერმინისტრის, ირაკლი ღარიბაშვილის განცხადებით, დღეიდან, 11 აპრილიდან რეცეპტის გამოწერა არა რომელიმე კონკრეტული მწარმოებლის, ბრენდის მიხედვით, არამედ მხოლოდ გენერიკული, ანუ საერთაშორისო დასახელებით მოხდება.

"უკვე დღეიდან, ძვირფასო მეგობრებო, 11 აპრილიდან რეცეპტის გამოწერა მხოლოდ გენერიკული დასახელებით მოხდება, ანუ მე მინდა ჩვენს მოქალაქეებს განვუმარტო, შემდეგ ბატონი მინისტრი ახსნის ამ ინიციატივის არსს. დღეიდან ექიმი ვალდებული იქნება, რომ წამალი მხოლოდ გენერიკული, ანუ საერთაშორისო დასახელებით გამოწეროს და არა რომელიმე კონკრეტული მწარმოებლის, ბრენდის მიხედვით", — ამბობს ღარიბაშვილი.

მისი განმარტებით, ეს ნიშნავს იმას, რომ ფარმაცევტი მომხმარებელს გენერიკული მედიკამენტის ე.წ. პოზიტიური სიიდან 3 ყველაზე იაფ წამალს შესთავაზებს, რის შემდეგაც მოქალაქე გადაწყვეტს, რომელს შეიძენს.

"ახლა ეს რას ნიშნავს — ფარმაცევტი მომხმარებელს, ჩვენს მოქალაქეს გენერიკული მედიკამენტების ე.წ. პოზიტიური სიიდან 3 ყველაზე იაფ წამალს შესთავაზებს. ეს იქნება მისი ვალდებულება. მას შემდეგ, რაც ექიმი გამოწერს რეცეპტს, შემდეგ ფარმაცევტი ვალდებული იქნება, რომ მოქალაქეს შესთავაზოს 3 ყველაზე იაფი წამალი. ამის შემდეგ, რა თქმა უნდა, მოქალაქე თავად გადაწყვეტს, თავად მიიღებს გადაწყვეტილებას, თუ რომელი წამალი შეიძინოს.

ჩვენი მოლოდინი არის, რომ გენერიკული რეცეპტრების დანერგვით რისკები, რომელიც ექიმების მხრიდან არსებობს, რა თქმა უნდა, ყველაზე არ მაქვს საუბარი, მაგრამ იყო პრობლემა, უნდა ვაღიაროთ ექიმების, ფარმაცევტების მხრიდან — შესაძლო შსაძლო ბრენდული კონკრეტული კომპანიების თუ მწარმოებლების მედიკამენტების ლობირება, არაკეთილსინდისიერი მარკეტინგი, წამლის ფასების ხელოვნური ზრდა იქნება დაზღვეული. ამით პრაქტიკულად აღმოიფხვრება ეს რისკი. ეს პრობლემა მოგვარდება. ეს, რა თქმა უნდა, დაეხმარება იმ პროცესს, რაც დავიწყეთ, თურქეთიდან მედიკამენტების შემოტანას და ზოგადად, ფარმაცევტულ ბაზარზე სიტუაცია რადიკალურად შეიცვლება — ესაა ჩვენი მოლოდინი", — ამბობს პრემიერმინისტრი.

ღარიბაშვილის თქმოთ, მიზანია, რომ ფარმაცევტული სფერო იყოს მაქსიმალურად გახსნილი, გამჭვირვალე, კონკურენტუნარიანი.