კულტურის სფეროს წარმომადგენლები ცენზურაზე საუბრობენ და პარლამენტის წევრს, ელისო ბოლქვაძეს მოუწოდებენ, აიღოს პასუხისმგებლობა და აღარსრულოს კულტურის კომიტეტმა საკუთარი მოვალეობა. მათი თქმით, ის, ვინც თვალს ხუჭავს რეპრესიებზე, არ შეიძლება, მშვიდობის ელჩად იწოდებოდეს.

პარლამენტში პარტია ლელოს წევრები კულტურის სფეროს წარმომადგენლებს შეხვდნენ, დასრულების შემდეგ კი ბრიფინგი გაიმართეს.

"მოვითხოვთ ქალბატონმა ელისო ბოლქვაძემ, რომელიც წარმოადგენს კულტურის სფეროს საქართველოს საკანონმდებლო ორგანოში, აიღოს საკუთარ თავზე პასუხისმგებლობა, წინააღმდეგ შემთხვევაში ჩვენ ამ მტრული გარემოს გამო და ამ ცენზურის გამო და სხვა უამრავი შემაფერხებელი გარემოების გამო მოვითხოვთ, რომ მას ჩამოერთვას მშვიდობის ელჩის ტიტული იუნესკოში, რომელიც მას აქვს. ადამიანი, რომელიც კულტურის სფეროში მიმდინარე რეპრესიებზე თვალს მოხუჭავს, არ შეიძლება, მშვიდობის ელჩად იწოდებოდეს მიგვაჩნია ჩვენ", — თქვა პოეტმა, პაატა შამუგიამ.

მისივე განცხადებით, კულტურის სფეროში კრიზისი დგას. შამუგიას შეფასებით, დახშულია კომუნიკაცია და ჩამკვდარია დიალოგი კულტურის სფეროს წარმომადგენლებსა და კულტურის სამინისტროს შორის.

"ყველაზე მავნე და გამანადგურებელი ამ სფეროსთვის არის, ჩემი გადმოსახედიდან, ის, რასაც ცენზურა ჰქვია და რომლის მცდელობის არაერთ მაგალითს ჩვენ ყოველდღიურ ცხოვრებაში ვხედავთ, დავინახეთ, მათ შორის, ლიტერასთან დაკავშირებით, მწერალთან სახლთან დაკავშირებით. იქამდე წიგნის ცენტრთან დაკავშირებით. მუდმივად მიდიოდა ეს წნეხი. მე ახლა კონკრეტულად მწერლობაზე ვსაუბრობ, მაგრამ ნებისმიერი სხვა სფერო ეს იქნება კინოცენტრი თუ ეროვნული მუზეუმი, თუ სხვადასხვა მუზეუმი ყველგან მიდის ცენზურის მცდელობა. არა თუ მცდელობა, უკვე ბევრგან განხორციელებულია ეს ქმედება. ჩვენ მოვითხოვთ, რომ პარლამენტმა, კულტურის კომიტეტმა აღასრულოს თავისი მოვალეობა", — თქვა მან ბრიფინგზე.

კინორეჟისორმა, სალომე ჯაშმა კი თქვა, რომ თეა წულუკიანმა მოახდინა კულტურის სფეროს უზურპაცია. კულტურის მკვლევარმა სოფიო კილასონიამ აღნიშნა ისიც, რომ კულტურის სამინისტრო დევნის განსხვავებულ აზრს, ასუსტებს ინსტიტუციებს.