უკრაინის საგარეო საქმეთა მინისტრის, დმიტრო კულებას განცხადებით, უცხო ქვეყნის მოქალაქეების, რომლებიც გადიან უკრაინიდან, საზღვრებზე უნდა ჰქონდეთ თანაბარი შესაძლებლობა, რათა საკუთარ ქვეყნებში დაბრუნდნენ. კულებამ ეს მას შემდეგ დატვიტა, რაც მედიით გავრცელდა ინფორმაცია, რომ ინდოეთისა და აფრიკის მოქალაქეები საზღვრებზე რასიზმს აწყდებიან.

"უკრაინაში რუსეთის შეჭრამ მრავალი დამანგრეველი გავლენა მოახდინა უკრაინელ მოქალაქეებსა და ასევე არამოქალაქეებზე. აფრიკის მოქალაქეები, რომლებიც გადიან ქვეყნიდან ჩვენი მეგობრები არიან და უნდა ჰქონდეთ თანაბარი შესაძლებლობები, რათა თავიანთ ქვეყნებში უსაფრთხოდ დაბრუნდნენ. უკრაინის ხელისუფლება ძალისხმევას არ იშურებს პრობლემის გადასაჭრელად", — წერს კულება.

პირველ მარტს CNN-მა გაავრცელა ინფორმაცია, რომ უკრაინიდან გაქცეული ინდოელი და აფრიკელი სტუდენტები საზღვარზე რასიზმს აწყდებიან. ერთ-ერთი სტუდენტი ჟურნალისტს ეუბნება, რომ ტრანსპორტში არ აუშევეს და უთხრეს, რომ მასში მხოლოდ უკარაინის მოქალაქეები უნდა ჩამსხდარიყვნენ. ერთი ინდოეთის მოქალაქე კი ამბობს, რომ საზღვრამდე მისასვლელად 3 საგუშაგოს გავლა უწევს, თუმცა მათ გავლის საშუალება არ აძლევენ.

გაეროს მონაცემებით, ბოლო 6 დღეში უკრაინა 600 000-ზე მეტმა ლტოლვილმა დატოვა. ლტოლვილები ძირითადად გადადიან პოლონეთში, უნგრეთში, მოლდოვაში, რუმინეთში, სლოვაკეთში, ნაწილი კი მათი გავლით სხვა ქვეყნებში მიდის. გაეროს ლტოლვილთა უმაღლესი კომისარიატი წერს, რომ საზღვრებთან რიგებია.

დამატებითი ინფორმაცია უკრაინაში მიმდინარე მოვლენებზე განახლებად რეჟიმში შეგიძლიათ ნახოთ აქ:

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში