უნგრეთის საზოგადოებრივმა მაუწყებელმა M1-მა მაუწყებლობა დროებით შეაჩერა. ეკრანზე გამოჩნდა წარწერა სადაც ეწერა, რომ საზოგადოებრივ მაუწყებელს ტყუილის თქმის უფლება არ აქვს და რომ ისინი წლების განმავლობაში სიცრუის ტირაჟირებისთვის ბოდიშს იხდიდნენ.

ეს წარწერა ეკრანზე 19:56 საათამდე ჩანდა, რის შემდეგაც მაუწყებლობა მხატვრული ფილმით განახლდა, თუმცა საინფორმაციო გამოშვებების გარეშე.

"საზოგადოებრივი მაუწყებელი არ უნდა იტყუებოდეს. ბოდიშს გიხდით იმის გამო, რომ ამას ამდენი წლის განმავლობაში ვაკეთებდით! საზოგადოებრივი მაუწყებელი იწყებს ტრანსფორმაციას, რათა მომავალში დამოუკიდებელი და სანდო გახდეს. საინფორმაციო სამსახურის მუშაობა დროებით შეჩერებულია. დარჩით ჩვენთან!" — ეწერა ეკრანზე.

ამავდროულად, მუშაობა შეწყვიტა ვებგვერდმა Hirado.hu-მაც, სადაც მომხმარებლებს იგივე წარწერა ხვდებოდათ, ხოლო "კოშუტ რადიოს" ეთერში მხოლოდ მუსიკა გადაიცემოდა.

უნგრეთის საინფორმაციო სააგენტოს (MTI) მიერ გავრცელებული განცხადების თანახმად: "19:56 საათზე M1 დროებით განაახლებს მუშაობას ახალი ფორმატით — ეთერში გავა ფილმები, საინფორმაციო გამოშვებების გარეშე. "ბარტოკ რადიოს" პროგრამის მოსმენა დროებით შესაძლებელი იქნება "კოშუტ რადიოს" სიხშირეზე, ამ ეტაპზე ასევე საინფორმაციო გამოშვებების გარეშე. ახალი საინფორმაციო დირექტორატის ჩამოყალიბების პარალელურად, საინფორმაციო გადაცემები ეტაპობრივად, გეგმის მიხედვით აღდგება. ეს გარდამავალი პერიოდი სხვა პლატფორმებზე საინფორმაციო გამოშვებების გარდა სხვა პროგრამების შეთავაზებაზე მნიშვნელოვან გავლენას არ მოახდენს".

პრემიერმინისტრმა პეტერ მადიარმა პროპაგანდის შეჩერებას Facebook-ზე ისტორიული მოვლენა უწოდა.

საპარლამენტო საარჩევნო კამპანიის დროს, პეტერ მადიარი და პარტია ტისზას რამდენიმე პოლიტიკოსი აცხადებდნენ, რომ გამარჯვების შემთხვევაში, საზოგადოებრივ მაუწყებელში სახელმწიფო ბიუჯეტიდან დაფინანსებულ პარტიულ პროპაგანდას წერტილს დაუსვამდნენ. MTVA-ის ფარგლებში, ფიდესის პროპაგანდის მთავარი დასაყრდენი ტელეარხი M1 იყო, რომელიც ორბანის მთავრობის დროს, საზოგადოებრივი მაუწყებლის ფიდესელმა ხელმძღვანელობამ საინფორმაციო არხად გადააკეთა.