უკრაინის საგარეო საქმეთა მინისტრის დმიტკულებას განცხადებით, რუსეთის პრეზიდენტის, ვლადიმერ პუტინის ბრძანება რუსული არმიის შემაკავებელი ძალების საბრძოლო მორიგეობის განსაკუთრებულ რეჟიმზე გადაყვანასთან დაკავშირებით, არის უკრაინაზე ზეწოლის მცდელობა, დაგეგმილი მოლაპარაკებების წინ.

"როგორც შენიშნეთ, ეს ბრძანება მიიღეს მას შემდეგ, რაც გაკეთდა განცხადება ორი დელეგაციის შეხვედრისთვის მზადყოფნის შესახებ. ჩვენ ამ ბრძანებას ვხედავთ, როგორც ფსონების ამაღლებისა და უკრაინის დელეგაციაზე დამატებითი ზეწოლის მცდელობას", —თქვა კულებამ.

საგარეოს მინისტრმა აღნიშნა, რომ უკრაინის ოფიციალური პირები მზად არიან, "მოუსმინონ რუსეთის სათქმელს" და განიხილონ, როგორ შეაჩერონ ომი.

პუტინმა ბრძანება გასცა, რუსული არმიის შემაკავებელი ძალები საბრძოლო მორიგეობის განსაკუთრებულ რეჟიმზე გადაიყვანონ. რუსული გამოცემა Meduza წერს, რომ რუსეთის პრეზიდენტის განცხადებიდან გაურკვეველია, ეხება თუ არა ეს ბირთვულ იარაღს.

ბრძანებამდე უკრაინის პრეზიდენტმა, ვოლოდიმირ ზელენსკიმ განცხადა, რომ ბელარუსის პრეზიდენტთან, ალექსანდრე ლუკაშენკოსთან სატელეფონო საუბრისას შეთანხმდნენ, რომ რუსული და უკრაინული დელეგაციები ერთთმანეთს მოსალაპარაკებლად უკრაინა-ბელარუსის საზღვარზე, მდინარე პრიპიატის მიდამოებში შეხვდებიან.

24 თებერვალს პუტინმა უკრაინაში ომი დაიწყო. კრემლში ამტკიცებენ, თითქოს მშვიდობიან მოსახლეობას თავს არ ესხმიან, რაც ტყუილია — იბომბება დასახლებები, ბაღები, სკოლები, საავადმყოფოები. რუსეთმა უკრაინას სხვადასხვა ტერიტორიიდან შეუტია და ახლა საომარი მოქმედებები ქვეყნის არაერთ რეგიონსა და ქალაქში მიმდინარეობს, მათ შორის, კიევის ოლქთან.

ორივე მხარეს არის დანაკარგები — დაიღუპა ასეულობით მშვიდობიანი მოქალაქე და სამხედრო პირი. რუსული ჯარები ცდილობენ ხელში ჩაიგდონ მნიშვნელოვანი ობიექტები, უკრაინა მათ წინააღმდეგობას უწევს. სამხედრო მოქმედებებს თან ახლავს კიბერშეტევები, დეზინფორმაციისა და პროპაგანდის ტალღა.

ვოლოდიმირ ზელენსკიმ ქვეყანაში ჯერ სამხედრო მდგომარეობა, შემდეგ კი საყოველთაო მობილიზაცია გამოაცხადა და თქვა, რომ იარაღს მისცემენ ყველას, ვისაც ქვეყნის დაცვა ენდომება. ზელენსკიმ არაერთხელ მოუწოდა პარტნიორებს დახმარებისა და სერიოზული ნაბიჯების გადადგმისკენ და აღნიშნა, რომ ომი არამხოლოდ უკრაინაში, არამედ ევროპაშია.

ევროკავშირმა, აშშ-მ, დიდმა ბრიტანეთმა, კანადამ, იაპონიამ, ავსტრალიამ, სამხრეთ კორეამ, ტაივანმა, ახალმა ზელანდიამ, გერმანიამ რუსეთს სანქციები დაუწესეს, რომელიც მოიცავს ფინანსურ შეზღუდვებს ფიზიკურ და იურიდიულ პირებზე, რუსულ ელიტაზე, ოლიგარქებზე, მსხვილ ბანკებზე, ავიაკომპანიებზე. უკრაინა უფრო ეფექტური ნაბიჯების გადადგმას ითხოვს. აშშ-მ დაასანქცირა ვლადიმერ პუტინი და სერგეი ლავროვიც.

დამატებითი ინფორმაცია უკრაინაში მიმდინარე მოვლენებზე განახლებად რეჟიმში შეგიძლიათ ნახოთ აქ:

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში